धनगढीको जुगेडामा कार्यरत असई गोविन्द विकको हत्यारा पत्ता लगाई कारबाही गर्न माग गर्दै आफन्तहरुले जिल्ला प्रहरी कार्यालय कैलाली अगाडि प्रदर्शन गरिरहेका छन् ।

कञ्चनपुरबाट पुगेका आफन्त र स्थानीयले जिल्ला प्रहरी कार्यालय अगाडि चक्काजाम गर्दै प्रदर्शन गरेका हुन्। असई बिकको स्थायी घर कञ्चनपुरको पुनर्वास नगरपालिका वडा नम्बर–८ ‘ख’ मा हो । २८ वर्षीय विकको शव आज बिहान मोहना नदीमा फेला परको थियो।

शव धारिलो हतियारले घाँटी काटिएको अवस्थामा फेला परेको थियो । प्रहरीले घटनामा संलग्न भएको आशंकामा सोही क्षेत्रबाट ११ जनालाई नियन्त्रणमा लिएर सोधपुछ गरिरहेको छ।

असईसँगै बेपत्ता भएका प्रहरी जवान रामबहादुर साउँदको अवस्था अज्ञात छ । प्रहरीले खोजी कार्य जारी राखेको छ । उनले प्रयोग गर्ने मोबाइल भने नदीमा फेला परेको प्रहरीले जनाएको छ ।

२ कात्तिक २०७७, आइतवार १८:०० बजे प्रकाशित