सुदूरपश्चिम प्रदेशसभाको दसौं तथा बर्खे अधिवेशन शुक्रबार राति अन्त्य हुने भएको छ । पहिलो प्रदेशसभाको कार्यकालको यो अन्तिम अधिवेशन पनि हो ।

प्रदेश प्रमुख देवराज जोशीले प्रदेश सरकारको सिफारिस बमोजिम चालु बर्खे अधिवेशन  आज राति १२ बजेदेखि लागू हुनेगरी अन्त्यको आह्वान गरेका हुन् ।

प्रदेशसभाको शुक्रबारको बैठकमा सभामुख अर्जुनबहादुर थापाले प्रदेश प्रमुखको अधिवेशन अन्त्यसम्बन्धी पत्रबमोजिम राति १२ बजेदेखि लागू हुने गरी अधिवेशन अन्त्यको घोषणा गरे । प्रदेशसभाको पाँच वर्षे कार्यकाल आगामी मंसिरमा समाप्त हुँदैछ ।

गत जेठ १६ गते प्रदेशसभाको दसौं अधिवेशन सुरु भएको थियो । बर्खे अधिवेशनमा २७ वटा बैठक बसेको प्रदेशसभा सचिवालयले जानकारी दिएको छ ।

प्रदेशसभा सचिव देवबहादुर बोगटीका अनुसार ५ वर्षे कार्यकालमा प्रदेशसभाले संशोधन विधेयकसहित ६७ वटा विधेयक पारित गरेको छ ।

१७ भदौ २०७९, शुक्रवार २०:२० बजे प्रकाशित