नेकपा माओवादी केन्द्रका अध्यक्ष पुष्पकमल दाहाल प्रचण्डले आगामी तीन तहकै चुनावमा नेपाली कांग्रेससँग गठबन्धन हुने दाबी गरेका छन् । चितवन पुगेका प्रचण्डले स्थानीय तहको चुनावमा पनि केन्द्रबाट नै गठबन्धन हुने बताएका हुन् ।

चुनावी गठबन्धनको विषयमा चितवन कांग्रेसले भनेर केही नहुने उनको भनाइ थियो । ‘गठबन्धन त भइरहेकै छ नि । अहिलेकै गठबन्धन स्थानीय मात्र होइन प्रादेशिक र संघीय चुनावसम्म पनि रहन्छ’, उनले भने ।

चितवनमा कांग्रेसले एक्लै लड्ने भनेको छ नि भन्ने प्रश्नमा प्रचण्डले भने, ‘चितवन कांग्रेसले भनेर केही हुँदैन ।’ चितवनका कांग्रेस नेताहरूले यसपटक केन्द्रले निर्णय लाद्न खोजे पनि आफूहरूले माओवादीसँग गठबन्धन नगर्ने बताउँदै आएका छन् ।

कांग्रेसीहरूले रुखबाहेक अरुमा भोट नहाल्ने उनीहरूको भनाइ छ । तर, दाहालले स्थानीय, प्रदेश र संघीय निर्वाचनमा सरकारमा रहेका दलहरू बीचमा गठबन्धन हुने बताएका हुन् ।

१० चैत २०७८, बिहीवार ०९:५० बजे प्रकाशित