धनगढीको जुगेडास्थित अस्थायी प्रहरी चौकीका इन्चार्जसहित दुई जना प्रहरी वेपत्ता भएपछि घटनास्थलमा डिआईजी सहितको टोली पुगेको छ ।

टोली पुगेपछि अस्थायी प्रहरी चौकीका ईञ्चार्ज प्रहरी सहायक निरीक्षक (असई) गोविन्द बिकको शव मोहना नदीबाट निकालिएको छ ।

गतरातिदेखि बेपत्ता भएका असई  बिकको शव आज बिहान सीमा नाकाको मोहना नदीमा फेला परको थियो । उनको घाटीमा धारीलो हतियारको चोट देखिएको प्रहरीले जनाएको छ । मोहना नदी नजिकै रहेको उखुबारीमा रगतका छिटा सेमेत देखिएकाले हत्या भएको हुन सक्ने प्रहरीको आशंका छ ।

उनीसंगै गस्तीमा गएका प्रहरी जवान रामबहादुर साउँद भने फेला परेका छैनन् । चौकीबाट मोटरसाईकलमा राति साढे आठ बजे गस्तीमा निस्किएका दुबै जना साढे ११ बजेदेखि सम्पर्कबिहिन भएका थिए ।

उनीहरुको खोजी गर्दा आज बिहान चौकीबाट एक किमीको दूरीमा उनीहरुले प्रयोग गरेको मोटरसाईकल फेला परेको थियो भने करीव तीन किमीको दूरीमा रहेको मोहना नदीमा लाश फेला परेको थियो ।

अहिले प्रहरी नायव महाननिरीक्षक उत्तम सुवेदीसहित, सशस्त्र प्रहरी, भारतीय सुरक्षाकर्मीलगायतको टोली घट्नास्थल पुगेको छ । घटनाको प्रकृति हेर्दा तातस्करहरुसंग झडप भएको हुनसक्ने प्रहरीको अनुमान छ ।

२ कात्तिक २०७७, आइतवार १३:३७ बजे प्रकाशित