पत्रकार महासंघ कैलालीले धनगढीस्थित दिनेश संचार गृहमा प्रवेश गर्दै त्यहाँ कार्यरत पत्रकारलाई कुटपिट गर्ने व्यक्तिहरुलाई तत्काल कानूनी दायरामा ल्याउन माग गरेको छ ।

घटना भएको दुई दिनसम्म पनि दोषीलाई पक्राउ गर्न नसकेको भन्दै पत्रकार महासंघले प्रमुख जिल्ला अधिकारीलाई २४ घण्टे अल्टिमेटम दिएको छ । महासंघको अगुवाईमा शनिबार भएको छलफलपछि प्रमुख जिल्ला अधिकारी यज्ञराज बोहरालाई ध्यानाकर्षण पत्र बुझाउँदै २४ घण्टे अल्टिमेटन बुझाइएको महासंघका अध्यक्ष जगत साउँदले जानकारी दिए ।

ध्यानाकर्षण पत्र बुझ्दै प्रमुख जिल्ला अधिकारी बोहराले आइतबारसम्ममा दोषीलाई पक्राउ गर्ने आश्वासन दिएका छन् । उनले घटनाबारे अनुसन्धान भइरहेको जानकारी दिए ।

प्रहरी कार्यालय कैलालीको थुनुवा कक्षको सौचालयमा मृत भेटिएका व्यक्तिको बारेमा सम्प्रेषित समाचार डिलिट गर्नुपर्ने भन्दै एक समूहले शुक्रबार दिनेश सञ्चार गृहमा आक्रमण भएको थियो । त्यहाँ कार्यरत पत्रकार र कर्मचारीमाथि कुटपिट गरेको थियो ।

प्रहरीले दिएको जानकारीको आधारमा दिनेश खबरले धनगढीमा प्रहरीको थुनुवा कक्षभित्र १९ वर्षीय युवकले आत्महत्या गरेको समाचार सम्प्रेषण गरेको थियो । तर सञ्चार गृहमा आक्रमण गर्नेहरुले भने त्यो आत्महत्या नभई हत्या भएको भन्दै समाचार डिलिट गर्नुपर्ने वा सच्याउनुपर्ने भन्दै पत्रकारलाई कुटपिट गरेका थिए ।

२७ भदौ २०७७, शनिवार १९:०१ बजे प्रकाशित