राष्ट्रपति निर्वाचनका लागि आज राति १२ बजेबाट मौन अवधि शुरु हुने भएको छ। निर्वाचन आयोगले आज राति १२ बजेदेखि प्रचारप्रसारमा रोक लगाएको छ ।

निर्वाचनलाई स्वच्छ, स्वतन्त्र, निष्पक्ष, विश्वसनीय, पारदर्शी तथा भयमुक्त वातावरणमा सम्पन्न गर्न मतदान हुने दिनको अघिल्लो ४८ घण्टादेखि मतदान केन्द्र बन्द नहुञ्जेलसम्म प्रचारप्रसार गर्न नपाइने व्यवस्था छ । आयोगले आज विज्ञप्ति जारी गर्दै सोही व्यवस्थाअनुसार फागुन २५ गते मतदान केन्द्र बन्द नभएसम्म प्रचारप्रसार गर्न नपाइने स्पष्ट पारेको हो ।

‘फागुन २२ गते राति १२ बजेदेखि मतदानको दिन फागुन २५ गते मतदान केन्द्र बन्द नभएसम्म प्रचारप्रसार निषेधको अवधि कायम रहने व्यहोरा सम्बन्धित राजनीतिक दल, उम्मेदवार, मतदाता र सम्बद्ध सबैलाई अवगत गराइन्छ’, विज्ञप्तिमा भनिएको छ ।

त्यस्तै, मौन अवधिमा कुनै पनि प्रकारको छलफल, अन्तरक्रिया, सभा, सम्मेलन, कार्यशाला, गोष्ठी, उम्मेदवारको पक्षमा वा विपक्षमा प्रचारप्रसार, मत माग्न, एसएमएस गर्नलगायतका कार्य गर्न नहुने आयोगको भनाइ छ ।

आयोगले सामाजिक सञ्जालमार्फत उम्मेदवारको जीत–हारको पूर्वानुमानका सामग्रीहरु सार्वजनिक नगर्न पनि आग्रह गरेको छ ।

२२ फागुन २०७९, सोमवार १३:०० बजे प्रकाशित