स्याङ्जाको वालिङ नगरपालिका वडा १४ कफ्लेटीमा आज बिहान बाघले आक्रमण गर्दा तीन जना घाइते भएका छन् ।

बाघको आक्रमणबाट ६४ वर्षीय कृष्णलाल न्यौपाने, ६८ वर्षीया तुलसी पराजुली र २४ वर्षीया लक्ष्मी पराजुली घाइते भएका हुन् । खेतमा काम गरिहेका कृष्णलाललाई आक्रमण गरेपछि नजिकै पुगेका तुलसी र लक्ष्मीलाई पनि बाघले झम्टिएको हो ।

घाइते तीन जनालाई वालिङमा सामान्य उपचार गरी थप उपचारका लागि पोखरा पठाइएको छ । उनीहरु सबैको अवस्था गम्भीर रहेको प्रहरीले जनाएको छ । बाघलाई अहिले चण्डीप्रसाद पराजुलीको घरभित्र एउटा कोठामा थुनेर राखिएको स्थानीयले बताएका छन् ।

बाघलाई नियन्त्रणमा लिन प्रहरीसहित वन कार्यालयको टोली घटनास्थल पुगेको वडा प्रहरी कार्यालय वालिङका प्रमुख डीएसपी ढकेन्द्र खतिवडाले जानकारी दिनुभयो ।

२५ कात्तिक २०७९, शुक्रवार १२:५२ बजे प्रकाशित