काठमाडौं महानगरपालिकाका मेयर बालेन्द्र शाह (बालेन) ले संविधान संशोधन गरेर भए पनि नक्सा पास गर्ने अधिकार सर्वोच्चलाई दिनुपर्ने टिप्पणी गरेका छन् ।

‘नक्सा पास नगरी बनाएको संरचनाहरूलाई कारबाही गर्ने तथा नक्सा पास गर्ने अधिकार बरु संविधान नै संशोधन गरेर सर्वोच्च अदालतलाई दिने व्यवस्था गर्न हार्दिक अनुरोध गर्दछौँ,’ बालेनले फेसबुकमा लेखेका छन् ।

महानगरपालिकाले नर्भिक अस्पताललाई नियमविपरीत बनाइएका संरचना २४ घण्टाभित्र हटाउन दिएको अल्टिमेटम तत्काल कार्यान्वयन नगर्न सर्वोच्चले अल्पकालीन अन्तरिम आदेश दिएपछि बालेनको उक्त प्रतिक्रिया आएको हो ।

महानगरले नक्सा पास नै नगरी बनाइएका संरचना २४ घण्टाभित्र हटाउन अल्टिमेटम दिएपछि नर्भिकले सर्वोच्चमा रिट दायर गरेको थियो । उक्त रिटमा सुनुवाइ गर्दै न्यायाधीश मनोजकुमार शर्माको इजलासले उक्त अल्टिमेटम तत्काल कार्यान्वयन नगर्न अल्पकालीन अन्तरिम आदेश दिएको हो ।

२५ साउन २०७९, बुधवार २०:५४ बजे प्रकाशित