हाडनाताभित्रको भाउजु नाता पर्नेसँगको करणीबाट जन्मिएको शिशुको हत्या गरेको अभियोगमा एक व्यक्तिलाई उच्च अदालत दिपायलले जन्मकैदको सजाय सुनाएको छ ।

अवैध यौनसम्बन्धबाट गर्भ रही जन्मेको शिशुलाई मार्न दबाव दिएको अभियोगमा बाजुराका राजकुमार बडुवाललाई जन्मकैदको सजाय सुनाइएको उच्च अदालत दिपायलले जानकारी दिएको छ । यसअघि प्रतिवादी राजकुमारलाई बाजुरा जिल्ला अदालतले निर्दोष रहेको भनी सफाइ दिएको थियो ।

प्रतिवादी राजकुमारले काकाको बुहारी, भाउजु रिंकुलाई (परिवर्तित नाम) करणी गरी गर्भ रहेको थियो । २०६९ साल जेठ २७ गते रिंकुले संन्तान जन्माएकी थिइन् । राजकुमारले बच्चा जन्मिने बित्तिकै मारिदिनु भन्दै दबाव दिँदै आएका थिए ।

कुनै समस्य आए आफू जवाफदेही हुने भन्दै पटक पटक राजकुमारले दबाव दिएपछि रिंकुले जन्मेको ३४ दिनमा कैरोलोको जरा बिषादी खुवाई आफ्नै सन्तानको हत्या गरेकी थिइन् ।

मंगलबार उच्च अदालतका कामु मुख्य न्यायाधिश टेकनारायण कुँवर र न्यायाधिश जगतवहादुर थापाको संयुक्त ईजलासले राजकुमारलाई मुख्य दोषी ठहर गर्दै जन्मकैदको फैसला सुनाएको हो ।

रिंकुलाई चार वर्ष कैद हुने गरी जिल्ला अदालत बाजुराले सुनाएको सजाय भने उच्च अदालतले सदर गरेको छ । मुद्दामा विषादी जडिबुटी ल्याई बालकलाई खुवाउन रिंकुलाई सहयोग गरेको आरोपमा एक महिलालाई ६ महिना कैद सजाय सुनाएको छ ।

भर्खरै जन्मेको शिशु हत्यामा गर्भ बोकाउने व्यक्तिलाई जन्मकैद हुने सजाय भएको यो सम्भवतः नौलो फैसला हो । शिशु हत्याका अधिकांश मुद्दाहरूमा बालक जन्माउने आमालाई मात्र दोषी ठहर गर्ने गरेकोमा उच्च अदालतले गर्भ बोकाउने व्यक्तिलाई मुख्य कसूरदार ठहराएको हो ।

लैङ्गिक न्यायको दृष्टिकोणबाट यस्तो अपराधमा जन्माउने आमाभन्दा शिशु मार्न बचन दिने बाबुको आपराधिक कार्यमा बढी जिम्मेवारी हुने अदालतको बुझाइ छ ।

१८ माघ २०७८, मंगलवार १९:५१ बजे प्रकाशित