मानव बेचबिखन मुद्दामा कैद तथा बिगो तिर्न फैसला सुनाइएका दाङका पत्रकार टोपबहादुर जिशीलाई प्रहरीले नियन्त्रणमा लिएको छ ।

अमेरिका पठाइदिने प्रलोभनमा ठगी गरेको भन्दै नरेश बस्नेतले जिशीविरुद्ध उजुरी दिएपछि जिल्ला प्रहरी कार्यालय दाङले मुद्दा चलाएको थियो ।

जिल्ला अदालत काठमाडौंका न्यायाधीश बद्रीप्रसाद ओलीको एकल इजलासले जिशीलाई मानव बेचविखन मुद्दामा दुई वर्ष कैद र १२ लाख रुपैयाँ बिगो जरिवानासहितको सजायँ सुनाएको थियो ।

पुष १९ गतेको अदालतको फैसलापछि जिशीलाई शुक्रबार प्रहरीले नियन्त्रणमा लिएको हो । जिशीलाई घोराहीबाट नियन्त्रणमा लिइएको प्रहरीले जनाएको छ ।

उनलाई कारागार पठाउने तयारी भइरहेको प्रहरीले जनाएको छ । जिशी नेपाल पत्रकार महासंघ दाङ शाखाका साधारण सदस्य हुन् ।

२ माघ २०७७, शुक्रवार १४:१७ बजे प्रकाशित