कञ्चनपुरमा जुवाडेलाई हतियार देखाएर चार लाख रुपैयाँ लुट्ने तीन जनालाई प्रहरीले पक्राउ गरेको छ । बेदकोट नगरपालिका वडा नम्बर ५ मा जुवाखालमा प्रवेश गर्दै हतियार देखाएर नगद र मोबाइल लुटेको आरोपमा कञ्चनपुर प्रहरीले तीन जनालाई पक्राउ गरेको सुदूरपश्चिम प्रदेश प्रहरी कार्यालयले जनाएको छ ।

नगद र मोबाइल लुट्ने वेदकोट नगरपालिका वडा नम्बर २ का २२ वर्षीय पारसमणि जोशी, सोही वडा नम्बर १ का केदार भनिने केशव विष्ट र कृष्णपुर नगरपालिका वडा नम्बर ५ का २६ वर्षीय दीपक भट्टलाई पक्राउ गरिएको प्रदेश प्रहरी कार्यालयका प्रवक्ता प्रहरी वरिष्ठ उपरीक्षक मुकेशकुमार सिंहले जानकारी दिए ।

उनकाअनुसार उनीहरुको साथबाट से ६ प २२६३ नम्बरको मोटरसाइकलसहित पेस्तोल, म्याग्जीन र २ राउण्ड गोली र दुई थान मोबाइलसमेत बरामद गरिएको बरामद गरिएको वरिष्ठ प्रहरी उपरीक्षक सिंहले बताए ।

लुटपाटमा संलग्न अन्य केही व्यक्तिहरु पनि फरार रहेको र उनीहरुको पनि खोजी भइरहेको प्रहरीले जनाएको छ ।

२३ कात्तिक २०७७, आइतवार १४:३१ बजे प्रकाशित