धनगढी उपमहागनरपालिका वडा नम्बर १२ स्थित अस्थाई प्रहरी पोष्ट जुगेडामा हाँजिर भएको तीन महिना मात्रै पुगेको थियो प्रहरी सहायक निरीक्षक गोविन्द बिकलाई । तीन महिनाको अवधिमा उनले स्थानीयमा आफ्नो छाप छोडिसकेका थिए । जनताको मन जितिसकेका थिए ।

स्थानीयकाअनुसार उनले छोटो अवधिमा सबैभन्दा राम्रो काम पनि गरेका थिए । यसअघि पनि उनले सीमा नाकाबाटै चोरी तस्करीका व्यापारिक सामानहरु समातेर ल्याएका थिए ।

यसैबीच दशैं आएपछि जिल्ला प्रहरी कार्यालय कैलालीले चाडपर्व लक्षित सुरक्षा योजना ल्यायो । सोही योजनाअनुसार दशैंमा सुरक्षा व्यवस्थालाई थप कडाई पार्नु थियो उनलाई । सुरक्षा रणनीतिअनुसार असई बिकले सुरक्षा व्यवस्था चुस्त पार्दै चोरी तस्करी रोक्न सीमामा गस्ती बढाए । सँधैको चोरी तस्करी हुने सीमा नाकामा दशैंमा झन बढी अबैध गतिविधि हुने गरेको स्थानीय बताउँछन् ।

चोरी तस्करी रोक्नकै लागि शनिबार राति ८ बजे असई बिक आफै प्रहरी जवान रामबहादुर साउँदसहित सीमामा खटिए । सो क्षेत्र वडा नम्बर १० मा पर्छ, जहाँ मोहना नदीले दुई देशबीचको सीमा छुट्याएको छ । सीमा क्षेत्रमा खटिएको तीन घण्टासम्म उनी सम्पर्कमै थिए । उनी राति १० बजेसम्म सम्पर्कमै रहेको विषय पनि गाउँमा भएको एक युवाहरुको समूहबीचको झडपले थाहा हुनपुग्यो । प्रहरी पोष्ट नजिक युवाहरुबीच झडप हुँदा कार्यालयमा रहेका प्रहरी हवल्दार त्यहाँ पुगे । त्यही क्रममा उनले झडपबारे असई बिकलाई फोन गरेर जानकारी गरेका थिए ।

यो क्रियाकलाप स्थानीय नेता समेत रहेका चन्द्रबहादुर बिले पनि हेरिरहेका थिए । ‘राति १० बजेसम्म मेरै आँखा अगाडि हवल्दारसापले असई सापलाई फोन गरेर के गरौं भनेर सोधेका थिए,’ उनले भने, ‘मैल हवल्दारसापलाई म सम्झाईहाल्छु, सामान्य विषयको विवाद हो भनेपनि उहाँहरु फर्किनुभयो, असई सापले पनि छोडिदेउन त भन्नुभएछ ।’ असईसाप सीमा क्षेत्रमा जानुभएको छ भन्नेबारे आफूले पनि त्यहीबेला मात्रै थाहा पाएको उनले बताए ।

राति १० बजेसम्म सम्पर्कमा रहेका असई त्यसपछि सम्पर्कमा रहेनन् । प्रहरी पोष्टमा नफर्किएपछि अस्थाई पोष्टबाट जिल्ला प्रहरीमा खबर भयो । जिल्ला प्रहरीबाट प्रहरी टोली खटियो । खोजतलासकै क्रममा विहान ५ बजे मात्रै नदीमा पानीमा घोप्टो परेको अवस्थामा शव देखियो । तर, कसको शव हो भन्ने यकिन भएन, किन कि प्रहरीले शव उठाउनु अघि गर्नुपर्ने कार्य गर्न बाँकी थियो ।

प्रहरीले बिहान ११ बजेपछि मात्रै पानी भित्र घोप्टो परेको शव उठाएपछि मात्रै उक्त शव असई बिकको हो भन्ने यकिन भयो । त्यसअघि आशंका मात्रै गरिएको थियो । घटनाको प्रकृति हेर्दा शव फेला परेको ठाउँ भन्दा झण्डै एक सय मिटर माथि उनलाई नदीमा फालिएको जस्तो देखिन्छ । त्यहाँ नजिकै नदी किनारमा रगतका छिटा देखिएको छ । असई विकको शव भेटिएपनि प्रहरी जवान साउँदको अवस्था अझै पत्ता लागेको छैन । अछामको बान्नीगढी(जैगड गाउँपालिकामा स्थायी घर भएका उनको अझै खोजी भइरहेको छ ।

सशस्त्र प्रहरीको गोताखोर टोलीले नदीमा खानतलास गर्दा असई विकको शव भेटिएको एक सय मिटर माथि साउँदले बोक्ने मोबाइल भेटाएको छ, तर उनको अवस्था पत्ता लागेकोे छैन । प्रहरी र स्थानीयले उनको खोजी कार्य जारी राखेका छन् ।

असई विकसहितले प्रयोग गरेको मोटरसाइकल बा ५८ प ५२८४ नम्बरको मोटरसाइकल मोहना नदी भन्दा पाँच सय मिटर परै रोकिएको अवस्थामा भेटिएको छ । मोटरसाइकल भन्दा केही परबाट प्रहरीमाथि आक्रमण भएको त्यहाँको प्रकृति हेर्दा स्पष्ट हुन्छ । नदीबाट अढाई सय मिटर वरै एक जोर चप्पल पनि देखिएको छ भने त्यहाँबाट अगाडि बढ्दै जाँदा प्रहरीको एक बुट पनि फेला परेको छ । उक्त बुट प्रहरी जवान साउँदको हुनसक्ने बुझिएको छ । किनभने प्रहरीका अनुसार असईको बुट भने खुट्टामै थियो ।

त्यस्तै मोहना नजिकै मोबाइल पनि भेटिएको छ भने नजिकै अर्को ठाउँमा रगत देखिएको छ । त्यहाँको अवस्था हेर्दा असई विकलाई नदी भन्दा वरै मारेर नदीमा फालिएको हुन सक्ने स्थानीय बताउँछन् । एक प्रहरीकाअनुसार त्यहाँ भेटिएको मोबाइल पनि प्रहरीको होइन ।

जिल्ला प्रहरी कार्यालय कैलालीका प्रवक्ता प्रहरी नायव उपरीक्षक प्रतिक विष्टले घटनाको प्रकृति हेर्दा हत्या नै गरिएको बताए । उनले घटनाबारे गम्भीर रुपमा अनुसन्धान भइरहेको र अनुसन्धानका लागि ११ जनालाई नियन्त्रणमासमेत लिइएको जानकारी दिए ।

उनकाअनुसार घटनास्थलबाट एक थान हतियार र एक थान म्यागेजिन फेला परेको छ । तर, अर्को एक थान हतियार, बुलेट र म्यागेजिन फेला नपरेको डीएसपी विष्टले जानकारी दिए । उनले असई विष्टको घाँटी रेटिएको र टाउकोमा हिर्काइएको देखिएको बताए । प्रहरीले अपराध अनुसन्धानका लागि ‘ट्र्याकर डग’ पनि परिचालन गरेको छ ।

३ कात्तिक २०७७, सोमवार ०९:२२ बजे प्रकाशित