इन्डियन प्रिमियर लिग (आईपिएल) मा रोयल च्यालेन्जर्स बैंगलोर (आरसीबी) ले कोलकाता नाइड राइडर्स (केकेआर) लाई तीन विकेटले हराएको छ । गए राति कोलकाताले दिएको १२९ रनको लक्ष्य आरसीबीले १९ ओभर २ बलमा सात विकेट गुमाएर पूरा गर्‍यो ।

आरसीबीका सेरफेन रदरफोर्डले सर्वाधिक २८ रन बनाए । यस्तै, सहबाज अहमेदले २७ र डेविड विलेले १८ रन जोडे । केकेआरका टिम साउदीले तीन विकेट लिँदा उमेश यादवले दुई र सुनिल नारायनले एक विकेट लिए ।

टस हारेर ब्याटिङमा निम्त्याइएको केकेआरले १८ ओभर ५ बलमा सबै विकेट गुमाएर १२८ रनको योगफल खडा गरेको थियो ।केकेआरका आन्द्रे रसेलले २५ रन बनाए । यस्तै, उमेश यादवले १८ रन जोड्दा साम विलिङ १४ रन बनाएर आउट भए ।

केकेआरलाई सस्तैमा समेट्न आरसीबीका बनिन्दु हसरंगाले सर्वाधिक चार विकेट लिए । चार ओभर बलिङ गरेका उनले २० रन खर्चिए । यसबाहेक, आकाशदिपले तीन र हर्शल पटेलले एक विकेट लिए ।

जितसँगै बैंगलोरले २ खेलमा २ अंक जोडेको छ । पहिलो खेलमा बैंगलोर पञ्जावसँग ५ विकेटले हारेको थियो । कोलकाताको यो पहिलो हार हो । पहिलो खेलमा कोलकाताले चेन्नई सुपर किङ्सलाई ६ विकेटले हराएको थियो ।

१७ चैत २०७८, बिहीवार ०७:५३ बजे प्रकाशित