एकीकृत नेकपा माओवादीले देशैभरिका वडामा एकैसाथ अधिवेशन गर्ने निर्णय गरेपछि कैलाली जिल्लामा पनि तयारी तीव्र तुल्याएको छ । मंसिर ४ गते हुने वडा अधिवेशनको तयारी थालिएको पार्टीका स्थानीय नेता रमेश धामीले जानकारी दिए ।

भर्खर सदस्यता नवीकरण र सदस्यता दिने काम सकिएको उनले बताए । कैलाली जिल्लामा नेकपा माओवादी केन्द्रका क्रियाशील सदस्य मात्र २३ हजार रहेको उनले जानकारी दिए ।धामीका अनुसार जिल्लामा सबैभन्दा बढी टीकापुर नगरपालिकामा २ हजार ६६८ क्रियाशील सदस्य छन् भने दोस्रोमा धनगढी उपमहानगरपालिकामा २ हजार ६३५ सदस्य छन् ।

माओवादी केन्द्रबारे फैलाइएको भ्रमलाई चिर्दै संविधानको रक्षा र संघीय लोकतान्त्रिक गणतन्त्रको रक्षाका खातिर पार्टीले निर्वाह गरेको भूमिकालाई जनतासम्म प्रभावकारी रुपमा प्रवाह गर्नका लागि वडा अधिवेशन सार्थक हुने माओवादी नेता धामीको भनाइ छ ।

२८ कात्तिक २०७८, आइतवार १६:२८ बजे प्रकाशित