सरकारले आवश्यक त्रुटि सच्याएर वितरण गर्ने भनेको पुस्तक लिम्पियाधुराको क्षेत्रफल समेटिएको पुस्तक अझै गुपचुप राखिएको छ ।

‘नेपालको भूभाग र सीमासबन्धी स्वाध्याय सामग्री’ परिमार्जनको काम अगाडि बढाएको छैन । प्रधानमन्त्री केपी शर्मा ओलीले भारतद्वारा अतिक्रमित लिम्पियाधुरासहितको क्षेत्रफल समेटिएको पुस्तकमा संशोधन आवश्यक रहेको भन्दै वितरण नगर्न १ असोजमा निर्देशन दिएका थिए । तर, अहिलेसम्म पुस्तकलाई गुपचुप राखेर सरकारले परिमार्जनमा चासो देखाएको छैन ।

प्रधानमन्त्री तथा मन्त्रीपरिषदको कार्यालयले सच्याउनुपर्ने सूची दिने भनेको तर अहिलेसम्म नदिएको पाठ्यक्रम विकास केन्द्रका एक अधिकारीले बताए । उनका अनुसार, विज्ञहरूको सल्लाह–सुझाव आउने सम्भावनालाई ध्यानमा राखेर पहिलो संस्करणमा पाँच सय प्रतिमात्र छापिएको थियो ।

‘नेपालको भूभाग र सीमासबन्धी स्वाध्याय सामग्री’को प्रकाशक रहेको केन्द्रका अधिकारीहरू नेपालको कुल क्षेत्रफलमा ४६०।२८ वर्गकिलोमिटर थपिने भएपछि आएको भारतीय दबाबले काम गरेको हुनसक्ने अनुमान गर्छन् ।

त्यसो त, शिक्षा मन्त्रालयले जस लिन लाग्यो भनेर भूमि व्यवस्था, सहकारी तथा गरिबी निवारण मन्त्रालय र परराष्ट्र मन्त्रालयले नै प्रधानमन्त्रीलाई उक्त किताब वितरण रोक्न दवाव दिएको कुरा पनि बाहिरिएको थियो ।

१४ असोज २०७७, बुधवार १७:५१ बजे प्रकाशित