बझाङको बित्थडचिर गाउँपालिकामा कमल बोहरा स्मृति भलिबल तथा देउडा प्रतियोगिताको चैत २८ देखि आयोजना हुने भएको छ ।

नेकपा एमाले बित्थडचिर गाउँ कमिटीद्वारा आयोजित प्रथम स्मृति भलिबल तथा देउडा प्रतियोगिता आउँदो मङ्गलवार देखी देउलेखमा हुने आयोजकले जनाएको छ ।
देवेश्वरी माविका अनेरास्ववियु प्रारम्भिक कमिटी अध्यक्ष कमल बोहराको प्रथम स्मृति दिवसको अवसरमा प्रतियोगिता आयोजना गर्न लागिएको नेकपा एमाले गाउँपालिका कमिटी अध्यक्ष दीपेन्द्र बोहराले बताए ।

प्रतियोगिताको विजेताले ३१ हजार १११ रुपैयाँ तथा तथा उपविजेताले २१ हजार १११ रुपैयाँ प्राप्त गर्नेछन् । यस्तै तेस्रो हुने टोलीले नगद ११ हजार १११ रुपैयाँबाट पुरस्कृत हुनेछन् ।खेल देवेश्वरी मावि देउलेखको खेलमैदानमा हुनेछ ।
यस्तै स्थानीय कला र संस्कृति, संरक्षण गरौँ हटाएर विकृति शीर्षकमा वडा स्तरीय महिला पुरुष देउडा प्रतियोगिता समेत हुनेछ ।

देउडा प्रतियोगितामा विजेताले १५ हजार, उपविजेताले १० हजार प्राप्त गर्नेछन् । यस्तै तेस्रो हुने टोलीले ५ हजार पुरस्कार प्राप्त गर्ने अध्यक्ष बोहराले बताए । सहभागी हुन इच्छुक टिमहरूले चैत २७ सम्म दर्ता हुनुपर्ने आयोजकले जनाएको छ ।

एमालेको चुनाव केन्द्रित आमसभामा सहभागी हुन सदरमुकाम चैनपुर गएका कमल बोहराको गत चैत २८ गते नदीमा डुबेर मृत्यु भएको थियो । एमाले बझाङले आयोजना गरेको आमसभा तथा कार्यकर्ता प्रवेश कार्यक्रममा नेकपा एमालेका अध्यक्ष केपी शर्मा ओली प्रमुख वक्ता थिए।

२४ चैत २०७९, शुक्रवार २१:२७ बजे प्रकाशित