नेपाली काँग्रेस कैलालीको नेतृत्व चयनका लागि तीन वटा प्यानलबीच प्रतिस्पर्धा हुने भएको छ । शनिबार सभापतिमा तीन जनाले आ–आफ्नो प्यानलसहित मनोनयन दर्ता गरेका छन् । सहमति हुन नसकेपछि संस्थापन पक्षकै दुई प्यानल बनेका छन् । इतर समूह पनि प्यानलसहित प्रतिस्पर्धामा उत्रिएको छ ।

संस्थापन पक्षका निवर्तमान उपसभापति प्रकाशबहादुर बम र पूर्वउपसभापति नारायणदत्त भट्टले सभापतिमा उम्मेदवारी दिएका छन् । यसअघि सभापतिमा उम्मेदवारी घोषणा गरेका भीम बडुवालले भट्ट नेतृत्वको प्यानलबाट उम्मेदवारी दिएका छन् ।

भट्ट नेतृत्वको प्यानललाई केन्द्रीय सदस्यहरु धनगढी उपमहानगरपालिकाका मेयर नृपबहादुर वड, उपमेयर सुशीला मिश्र, जिबन राना, इश्वरी न्यौपानेलगायत नेताहरुले समर्थन गरेका छन् । संस्थापन पक्षकै नेता बमको प्यानललाई निवर्तमान सभापति एव्म काँग्रेस सुदूरपश्चिमका महामन्त्री नरनारायण शाह ‘मनु’ लगायत नेताहरुको समर्थन छ ।

शाहको कैलालीमा राम्रो पकड रहेको मान्छि । संस्थापन पक्षमै दुई प्यानल बनेपछि रोचक प्रतिस्पर्धा हुने देखिएको छ । भट्टको प्यानलबाट उपसभापतिमा बडुवालसँगै रामप्रसाद चौधरी, सचिवमा केशव मिश्र र अमृत बिसी तथा सहसचिवमा रामसमझ राना र कलेसु चौधरीले उम्मेदवारी दिएका छन् ।

बमको प्यानलबाट उपसभापतिमा खेमराज चौधरी र तेजशंकर भट्ट, सचिवमा नृप सुनार र थर्क शाह तथा सहसचिवमा कृष्ण पाण्डेय र राजेन्द्र खड्काले उम्मेदवारी दर्ता गरेका छन् । शेखर कोइराला पक्षबाट सभापतिमा रामबहादुर कलेलले उम्मेदवारी दिएका छन् । उनको प्यानलबाट उपसभापतिमा यज्ञनिधि कोइराला र लोकराज पाण्डेय, सचिवमा देवानन्द जैशी र नवराज जोशी तथा सहसचिवमा रविन्द्रप्रताप सिंह र तीर्थराज जोशीले उम्मेदवारी दिएका छन् ।

१४ फागुन २०७८, शनिवार २०:२६ बजे प्रकाशित