नवनियुक्त श्रम, रोजगार तथा सामाजिक सुरक्षामन्त्री गौरीशंकर चौधरीले आफ्नो ध्यान स्वदेशमै रोजगारीको सृजना गर्नेतर्फ केन्द्रीत रहने बताएका छन् । नवनियुक्त श्रममन्त्री चौधरीले वैदेशिक रोजगारीमा देखिएको बेथिति अन्त्य गर्नका लागि आफूले प्रयत्न गर्ने पनि जानकारी गराए ।

मन्त्रालयमा आज पदबहाली गरेपछि सञ्चारकर्मीसँग कुराकानी गर्दै उनले भने, कोरोनाले व्यापार व्यवसाय नराम्ररी प्रभावित भएका छन्, रोजगारी कटौती भएको अवस्था छ, स्वदेशमै रोजगारीको वातावरण निर्माण गर्नेतर्फ लागि पर्छु ।

कोभिड–१९ का कारण वैदेशिक रोजगारीमा आएको सङ्कुचन, आन्तरिक श्रम बजारमा देखिएको बेरोजगारीको समस्यालाई समाधान गर्न जरुरी रहेको उनले बताए ।

आन्तरिक श्रम बजारमा प्रवेश गर्ने जनशक्ति बेरोजगार हुनुपर्ने अवस्थालाई अन्त्य गर्दै सामाजिक सुरक्षा योजनालाई प्रभावकारी ढङ्गबाट कार्यान्वयनमा लैजाने मन्त्री चौधरीले बताए।

उनले मन्त्रालयबाट सम्पादन हुँदै आएका कामकारवाही र अब गर्नुपर्ने कामका बारेमा छलफल गरेर अगाडि बढ्ने पनि बताए ।

१२ पुस २०७७, आइतवार १४:३१ बजे प्रकाशित