सेती प्रादेशिक अस्पतालको एकद्धार संकट व्यवस्थापन केन्द्र (ओसीएमसी)ले विभिन्न किसिमका संकटमा परेका महिला तथा बालबालिकाकालाई सहयोग गरिरहेको जनाएको छ ।
सो केन्द्रले लैंङ्गिक हिंसाको जोखिमयुक्त परिस्थीतिमा रहेका बेवारिसे तथा शारीरिक, मानसिक रुपले असक्त महिला तथा बालबालिकाकालाई सहयोग गरिरहेको जनाएको छ ।

लैंङ्गिक हिंसा पीडित महिला, अपांगता भएका महिला बालबालिका तथा जेष्ठ नागरिक महिलालाई सहयोग गर्न केन्द्रले एकद्धारबाट आवश्यक सेवा उपलब्ध गराइरहेको ओसीएमसीकी फोकल पर्सन यसोदा ढकालले बताइन् । अहिले पनि प्रत्यक्ष वा अप्रत्यक्ष रुपमा हरेक तीनमध्ये एक महिलाले हिंसा भोग्दै आएको उनले बताइन् ।

केन्द्रले हालसम्म १४६ जनाको शारीरिक परिक्षण, १४६ जनाको विधि बिज्ञान तथा चिकित्सकजन्य कानुनी परिक्षण तथा ७७ जनालाई एच।आइ।भी परिक्षण तथा परामर्श र गर्भ परिक्षण सेवा उपलब्ध गराएको जनाएको छ । यस्तै विभिन्न कारणले घाउ चोटपटक लागेको २८ जनाको औषधी उपचार गरिएको केन्द्रले जनाएको छ ।

बुधबार धनगढीमा एक कार्यक्रमको आयोजना गर्दै ओसीएमसीले गर्दै आएको काम बारे जानकारी गराइएको हो । कार्यक्रममा विभिन्न संघसंस्थाका प्रतिनिधि, प्रहरी, सरोकारवाला निकाय एवम् पत्रकारको उपस्थिति थियो ।

७ वैशाख २०७९, बुधवार २२:०२ बजे प्रकाशित