‘अब धनगढी दौडिन्छ’ को आठौं संस्करण यही चैत २६ गते शनिबारका दिन आयोजना हुने भएको छ । नयाँ वर्षको उपलक्षमा हरेक वर्ष वैशाख १ गते हुँदै आयोजना प्रतियोगिता यस वर्ष चैत २६ गते हुने  आयोजकले जनाएको छ ।
धनगढीमा शुक्रबार धनगढी जेसिजले पत्रकार सम्मेलनको आयोजना गर्दै प्रतियोगिताबारे जानकारी गराएको छ ।

धनगढी जेसिसका अध्यक्ष भुवन पाण्डेले चुवाव लगायत विभिन्न कारणले यस वर्ष प्रतियोगिता अघि सार्नु परेको बताए ।
‘अब धनगढी दौडिन्छ’ भन्ने मूल नाराका साथ हुने प्रतियोगिता यस वर्ष ‘मुख्यमन्त्री जेसिज एभरेष्ट धनगढी हाफ म्याराथन २०२२’ को रुपमा हुने भएको छ ।
धनगढी रंगशालाबाट शुरु हुने दौड प्रतियोगिता २१ दशमलव १ किलोमिटरको हुने बताए ।

प्रतियोगितामा २१ दशमलव १ किलोमिटरको खुला दौड, ५ किलोमिटरको कर्पोरेट र सञ्चार, ५ किलोमिटर महिला र विद्यार्थी तथा ट्राइसाकल रेस आयोजना हुने जनाइएको छ ।
दौड प्रतियोगितामा खुलातर्फ प्रथम हुनेले ५५ हजार ५ सय ५५ रुपैयाँ, दोस्रो ३३ हजार ३ सय ३३ रुपैयाँ र तेस्रो हुनेले २२ हजार २ सय २२ रुपैयाँ पाउने छन् ।

यसैगरी कर्पोरेट र सञ्चार र महिला तथा विद्यार्थीतर्फ पहिलो, दोस्रो र तेस्रो हुनेले क्रमशः ५ हजार ५ सय ५५, ३ हजार ३ सय ३३ र २ हजार २ सय २२ रुपैयाँ पुरस्कार पाउने आयोजक धनगढी जेसिजले जनाएको छ ।
प्रतियोगितामा सहभागी हुनका लागि रजिष्ट्रेशन शुल्क ३ सय (टिसर्ट सहित) र विद्यार्थीका लागि रजिष्ट्रेशन शुल्क २ सय (टिसर्ट सहित) निर्धारण गरिएको छ ।
यसका साथै सहभागी धावक मध्ये गोला प्रथाबाट एकजना भाग्यशाली धावकलाई आकर्षक उपहार प्रदान गरिने समेत आयोजकले जनाएको छ ।

१८ चैत २०७८, शुक्रवार १६:०५ बजे प्रकाशित