प्रधानमन्त्री शेरबहादुर देउवाले जेठ ४ गते एकै चरणमा निर्वाचनको तयारी गर्न निर्वाचन आयोगलाई आग्रह गरेका छन्। मंगलबार आयोगका पदाधिकारीहरूसँगको छलफलमा प्रधानमन्त्री देउवाले आयोगलाई यस्तो आग्रह गरेका हुन्।

‘हामीले जेठ ४ गते नै निर्वाचन गर्नुपर्ने भनेर प्रधानमन्त्रीसमक्ष प्रस्ताव गरेका थियौं। उहाँले त्यही मिति उपयुक्त छ भन्नुभयो,’ प्रधानमन्त्रीको भनाई उधृत गर्दै प्रमुख निर्वाचन आयुक्त दिनेश थपलियाले भने, ‘उहाँले एकै चरणमा निर्वाचनको आवश्यक तयारी गर्न निर्देशन दिनुभएको छ।’

प्रधानमन्त्रीले छलफलका क्रममा निर्वाचनका लागि आवश्यक सुरक्षा व्यवस्थाको सबै तयारी गृह मन्त्रालयले गर्ने भन्दै आयोगका तर्फबाट तयारी गर्न निर्देशन दिएका हुन्।

आयोगका अर्का एक पदाधिकारीले भने प्रधानमन्त्रीले अबको मन्त्रिपरिषद् बैठकबाट निर्वाचनको मिति घोषणा हुने बताएको जानकारी दिए। उनका अनुसार आउँदो बिहीबार बस्ने मन्त्रिपरिषद्को बैठकबाट सरकारले निर्वाचनको मिति घोषणा गर्ने देखिएको छ।

प्रमुख निर्वाचन आयुक्त थपलियाले सरकारले निर्णय गरेकै दिनदेखि आयोगले पनि निर्वाचनको आवश्यक तयारी अघि बढाउने बताए। ‘सरकारले निर्णय गरेको दिनदेखि नै हामीले पनि तीव्र रुपमा तयारी अघि बढाउँछौं,’ उनले भने।

१८ माघ २०७८, मंगलवार १८:१७ बजे प्रकाशित