नेपाली काँग्रेसका नवनिर्वाचित केन्द्रीय महाधिवेशन प्रतिनिधि एवम् नेविसंघका पूर्व कार्यवाहक अध्यक्ष क्षितिज भण्डारीले ‘स्मार्ट कांग्रेस निर्माणलाई सर्वपक्षीय युवा नेतृत्व’ अभियान सुरु गरेका छन् ।

भारतसंग जोडिएको कैलाली–कञ्चनपुरको त्रिकोणात्मक सीमा क्षेत्र गौरीफन्टा नाका नजिकबाट नेता भण्डारीले नेपालको माटोलाई साक्षी राख्दै अभियान सुरु गरेका हुन् ।

गौरीफन्टा सीमानाकास्थित नेपाली भूमि ७५३÷१७१ नम्बरको जंगेपिलरमा उभिएर पत्रकार सम्मेलनको आयोजना गर्र्दै उनले स्मार्ट कांग्रेस निर्माणको अवधारणा ल्याउन अभियान थालिएको बताए ।

भिजनसहितको मिशन बोकेर आफ्नो उम्मेदवारीबारे रायसुझाव संकलन गर्न नेपाली माटो बोकेर सुदूरपश्चिमदेखि सातवटै प्रदेशका राजधानीका आसपासका जिल्लाको यात्रा शुरुवात गरेको उनले बताए ।

साथै उनले गौरीफन्टा नाकालाई अन्तर्राष्ट्रिय नाकाको रुपमा विकास गरिनुपर्नेसमेत बताए । भारतीय पर्यटकको मानसरोवर अनि धार्मिक यात्राको गतिलो गन्तब्य बनाएर आर्थिक रुपमा समृद्धिको फड्को मार्न सकिने गौरीफन्टा नाकाबारे काँग्रेसका जिल्ला र प्रदेश अधिवेशनमा छलफल गरेर संस्थागत धारणा सार्वजनिक गर्नुपर्नमा उनको भनाइ छ । उनले गौरीफन्टा नाकामार्फत भारत र चीनसंगको सिधा व्यापारलाई पनि अगाडि बढाउन सकिने बताए ।

छाक टार्न रोजगारीका लागि भारत प्रवेश गर्नुपर्ने हाम्रो गरिबीको साक्षी पनि गौरीफन्टा नाका भएकाले यस्तो स्तरोन्नतिका लागि आजाव उठाउनुपर्ने उनको भनाइ छ ।

यस्तै, उनले सुदूरपश्चिममा प्रदेश सरकार मातहतका कार्यालय राजनीति दलमा समेत केन्दीकृत शासन मनोविज्ञानले विकास बजेट कनिका छरेको जस्तो भएको उनले बताए ।

यसअघि नेता भण्डारीले बाढीपहिरो, कोभिड–१९, लकडाउन र आगलागीदेखि १ लाख सदस्यलाई काँग्रेसको चुनाव चिन्ह रुख, फलफूल र तरकारीका बोटहरु वितरण गरेका थिए ।

साथै उनले अब देशभर रुद्राक्षको रुख वितरण र राष्ट्रिय टोपी वितरण अभियान लिएर जाने बताएका छन् ।

१० मंसिर २०७८, शुक्रवार १७:२१ बजे प्रकाशित