बझाङ जिल्लाको मुख्य राजमार्ग जयपृथ्वी राजमार्ग बन्द भएको २५ दिनपछि जयपृथ्वी राजमार्ग खुलाउने काम सुरु भएको छ । बझाङको जयपृथ्वी राजमार्ग जाल्या बगर र नारुगौडामा सेती नदीले सडक बगाएपछि बन्द भएको थियो ।

नारुगौडामा बम विस्फोट गरेर अहिले पनि काम सञ्चालन भइरहेको छ भने जाल्या बगरमा गएको आइतवारदेखि सेती नदीको धार परिवर्तन गर्ने काम सुरु भएको प्रमुख जिल्ला अधिकारी मोहन अधिकारीले बताए ।

​गएको असोज ३१ गतेदेखि कात्तिक ३ गतेसम्म लगातार भएको बेमौसमी वर्षाका कारण सेती नदीले जाल्या बगर र नारुगौडा राजमार्ग कटान गरेको थियो । सडक भएको ठाँउमा नै सेती नदी बगेपछि नारुगौडामा नयाँ सडक कटान गरी बाटो खुलाउने काम भइरहेको छ भने जाल्या बगरमा सेती नदीलाई डाइभर्सन तथा धार परिवर्तन गरी केही समयमा लागि भए पनि राजमार्ग सञ्चालन गर्ने काम सुरु भएको हो ।

राजमार्ग बन्द भएका कारण बजारमा पाइने दैनिक उपभोग्य वस्तुको मूल्य आकाशिएको छ । जिल्लाभन्दा बाहिर जाने यात्रुहरू अलपत्र परेका छन् । बिरामीहरूलाई पनि बाहिर जिल्ला लैजान स्टेचरको भरमा बोकेर नारुगौडासम्म लैजानुपर्ने बाध्यता रहेको छ ।

२५ कात्तिक २०७८, बिहीवार १९:०४ बजे प्रकाशित