विभिन्न माग राख्दै पाँच दलीय गठबन्धनले कैलालीको गौरीगंगा नगरपालिकामा लगाएको ताला पाँचौं दिनमा खुलेको छ । नगरकार्यपालिकाका सदस्यहरुले यसअघि नगरप्रमुखसहितको उपस्थितिमा गरिएको सहमती कार्यान्वयन गर्ने प्रतिबद्धता जनाएपछि नगरपालिकाको कार्यालयमा लगाइएको ताला शुक्रबार खुलेको हो ।

पाँच दलीय गठबन्धनले धनगरपालिमा अनियमितता भएको र त्यसको छानविन गर्नुपर्ने माग गर्दै भदौ २८ गते नगरपालिकाको कार्यालयमा तालाबन्दी गरेका थिए ।

समस्या समाधानका लागि छानविन समिति बनाउनुपर्ने मागका विषयमा नगरप्रमुख भीमबहादुर देउवाले कुनै चाँसो नदिएको भन्दै तालाबन्दी लम्बिएको नेपाली काँग्रेसका नेता दिनेश जोशीले बताए । उनले अहिले नगरकार्यपालिका सदस्यले यसअघि गरिएका सहमती कार्यान्वयन गराउने प्रतिबद्धता जनाएपछि ताला खोलिएको बताए ।

नगरपालिकामा लगाइएको ताला नखुलेपछि नगरप्रमुख भीमबहादुर देउवालाई सहमतीमा ल्याएर यसअघि गरिएका सहमती कार्यान्वयन गर्ने प्रतिबद्धतासहित गठनबन्धन दहरुले ताला खोलेको कार्यपालिका सदस्य भक्त विश्वकर्माले बताए ।

आर्थिक वर्ष २०७६/०७७ र २०७७/०७८ को नदीजन्य पदार्थको आयव्यय, राजस्व, कृषि शाखा, स्वास्थ्य शाखा, शिक्षा शाखा र नगरपालिकाका गाडीको आयव्यय, बेरुजु रकम लगाएको विषयमा कार्यपालिका सदस्यको संयोजकत्वमा पाँच राजनीतिक दलका जनप्रतिनिधि कार्यपालिका सदस्यको प्रतिनिधित्व हुने गरी सात सदस्यीय छानबिन समिति यही असोज ६ गते बस्ने कार्यपालिका बैठकबाट कार्यान्वयनमा ल्याउन पहल गर्ने प्रतिबद्धता जनाइएको उनले बताए ।

यसअघि शुक्रबार विहान पत्रकार सम्मेलन गर्दै नगरप्रमुख देउवाले समानन्य कुरामा गठबन्धन दलहरुले पाँच दिनसम्म नगरपालिकामा तालाबन्दी गरेर नागरिकका काममा अवरोध सृजना गरेको आरोप लगाएका थिए ।

१ असोज २०७८, शुक्रवार २१:५८ बजे प्रकाशित