देउवालाई विश्वासको मत दिने वा नदिने विषयमा नेपाल समूहमा लफडा
प्रधानमन्त्री भएको केही दिनमै शेरबहादुर देउवाले विश्वासको मत लिन खोजेपछि एमालेको माधव नेपाल पक्षमा थप संकट देखिएको छ । एमाले विवाद मिलाउने प्रयत्न जारी हुँदै गर्दा हतारमा विश्वासको मत लिने तयारी भएको भन्दै अहिलेसम्म नेपाल पक्षमा रहेका भीम रावलसहितका नेताहरु असन्तुष्ट रहेको बुझिएको छ ।
पार्टीभित्र केपी ओलीलाई स्थायी कमिटी र संसदीय दलको बैठकसमेत रोक्न आह्वान गर्दै आएको नेपाल पक्षका दोस्रो तहका नेताहरु विश्वासको मत लिने काम हतारमा गरिएको भन्दै नेता नेपालसँग पनि असन्तुष्ट भएका हुन् । यस अघिको कार्यदलमा रहेका भीम रावल, सुरेन्द्र पाण्डे र भीम आचार्य नेपालसँग असन्तुष्ट रहेको बताइन्छ ।
पछिल्ला केही दिनदेखि नेता रावल आफूसँग असन्तुष्ट रहेको छनक पाएपछि नेता नेपालले विश्वासको मतमा २३ जनामा एक दुईले छोडे पनि थप १० जना सांसद जुटाउने आश्वासन सत्तारुढ गठबन्धनलाई गराएका थिए । गठबन्धनको बैठक शनिबार राति बसेको थियो ।
नेपाल पक्षीय नेता भीम आचार्यले हतारमा विश्वासको मत लिनुलाई एमाले फुटाउने षडयन्त्र भएको प्रतिक्रिया संचारमाध्यमलाई दिएका छन् । यता कार्यव्यवस्था परामर्श समितिको बैठककमा समेत एमालेका सांसदहरुले विश्वासको मत आज नभई अर्को दिन लिन माग गरेका थिए ।
साथै एमाले मिलाउन यस अघि गठित भइ खारेज भइसकेको कार्यदलका सदस्यहरु फेरि छलफलमा जुटेका छन् । कोटेश्वरमा भएको छलफलमा एमालेमा नेपाल पक्षबाट भीम रावल, सुरेन्द्र पाण्डे र ओली पक्षबाट विष्णु पौडेल र सुवास नेम्वाङसहितका नेताहरु सहभागी रहेको बताइएएको छ ।
पछिल्लो समय एमाले विवाद मिलाउन दोस्रो तहका नेताहरु सक्रिय भए पनि अध्यक्ष ओलीले स्थायी कमिटीको बैठक रोक्न अस्वीकार गरेका थिए । पार्टी मिलाउन गरिएको १० बुँदे सहमति मान्न आफू तयार रहँदै आएको सन्देश ओलीले दिएका छन् । तर, माधव नेपाल अपराधी भएको भन्दै उनीबाहेकका नेतालाई मात्रै एमालेमा स्वागत गर्ने भनेपछि नेपाल उनीसँग थप बिच्किएका छन् ।
देउवालाई विश्वासको मत दिएर संसद् अबको ढेढ वर्ष ढुक्कले चल्ने भएपछि एमालेमा आफूहरुको बार्गेनिङ पावर झन् बढ्ने भन्दै विश्वासको छिट्टै दिएर जाने पक्षमा नेता नेपाल लागेका छन् ।
रावलसहितका सुरेन्द्र पाण्डेहरुले भोट नदिए पनि सरकार टिकाउन कुनै हालतमा विश्वाको मत पुग्ने गरी नेपाल पक्षका सांसदहरुले लागिरहेका छन् । विरोध खतिवडा, मेटमणि चौधरीसहितका नेताहरु खुलेर लागेका छन् । यसैबीच एमाले नेता झलनाथ खनालले पनि विज्ञप्ति जारी गर्दै देउवालाई विश्वासको मत दिन अपिल गरेका छन् ।
३ साउन २०७८, आइतवार १३:४३ बजे प्रकाशित
