कोरोनाको भारतीय भेरियन्टबारे अहिलेसम्म कुनै निष्कर्षमा पुग्न नसकिएको विश्व स्वास्थ्य संगठन (डब्ल्यूएचओ)ले जनाएको छ । बढी खतरनाक रहेको निष्कर्षमा पुग्न हतार नगर्नसमेत उसले चेतावनी दिएको छ ।

भारतमा कोरोना संक्रमण बढ्नुमा नयाँ भेरियन्ट कति जिम्मेवार छ भन्ने प्रष्ट नभएको भन्दै डब्ल्यूएचओले यसलाई ‘चिन्ताजनक’ भनेर वर्गीकरण नगरिएको प्रस्ट पारेको हो।

धेरै भिडभाड गरेर चाडपर्वलगायत कार्य आयोजना गरेकाले संक्रमण तीव्र रुपमा फैलिएको डब्ल्यूएचओकी प्रवक्ताले बताइन् । डब्ल्यूएचओका अनुसार छिट्टै फैलने, संक्रमित बढी सिकिस्त हुने र प्रतिरक्षा प्रणाली कमजोर बनाउने खालको भेरियन्टलाई चिन्ताजनक मानिन्छ ।

भारतको टाइम्स अफ इन्डियाले पनि संक्रमण फैलिनुमा धेरै तत्वले भूमिका खेलेको हुन सक्ने जनाएको छ । डब्ल्यूएचओले कोभिड–१९ को दक्षिण अफ्रिकी, ब्राजिलियन र बेलायती भेरियन्टलाई मात्र ‘चिन्ताजनक भेरियन्ट’को रुपमा वर्गीकरण गरेको छ ।

नयाँ भेरियन्ट भारतमा सन् २०२० डिसेम्बर १ मा भेटिएको थियो । भाारतमा महामारी फैलनुमा बेलायती भेरियन्ट समेत जिम्मेवार हुन सक्ने जनाइएको छ ।

सोमबार मात्र भारतमा तीन लाख ५२ हजार बढीमा कोरोना संक्रमण पुष्टि भएको विश्व स्वास्थ्य संगठनले जनाएको छ ।

१४ वैशाख २०७८, मंगलवार १३:१९ बजे प्रकाशित