जेसिज स्थापना दिवसमा आयोजित रक्तदानमा २६ जनाद्धारा रक्तदान
धनगढी, बैशाख २०। धनगढी जेसिजले आफ्नो ३८ औं स्थापना दिवस रक्तदान गरेर मनाएको छ । जेसीजले आयोजना गरेको रक्तदान कार्यक्रममा २६ जना व्यक्तिहरुले रगत दान गरेको कार्यक्रमका संयोजक मनिष कुवरले जानकारी दिए ।
प्रदेशका विभिन्न अस्पतालहरुमा रगतको कमी हुन थाले पछि जेसीजको ३८ औँ स्थापना दिवसका अवसरमा रगतको कमी हुन नदिन रक्तदान कार्यक्रम गरेको जेसीज धनगढीका अध्यक्ष श्याम पाठकले बताए ।
कोरोना महामारीका कारण सरकारले गरेको लकडाउनमा मानिसहरुको चहलपहल कम हुने र नियमित भैरहेको स्वेच्छिक रक्तदान समेत नभई रहेको अवस्थामा रक्तदान कार्यक्रमको आयोजना गरिएको धनगढी जेसिजले जनाएको छ । १९८२ मा सिनेटर रघुनाथ पाठक लगायतका अग्रजहरुको सामुहिक प्रयास बाट स्थापना भएको धनगढी जेसीजले आजदेखि ३८ बर्षिय यात्राको प्रारम्भ गरेको छ ।
त्यस्तै सुदुरपश्चिम प्रदेशमै सबैभन्दा बढी ८० पटक रक्तदान गरेका दीपक नेपालले अन्य समयको भन्दा अहिले रगतका लागि बिरामीले धेरै सास्ती भोग्नु परेको बताए ।
उनले लकडाउनका कारण कोहि पनी मानिस घर बाहिर निस्कन नपाउदा रगतका लागि बिरामीका आफन्तलाई धेरै नै समस्या हुने गरेको बताए ।
२० वैशाख २०७७, शनिवार ०६:४४ बजे प्रकाशित
