तत्कालिन नेकपा कम्युनिष्ट पार्टी (नेकपा) हुँदा भीम रावलको नेतृत्वमा पार्टीको खाताबाट लिइएको ३० लाख रुपैयाँ फिर्ता नभएको पाइएको छ । रावल तत्कालिन समयमा प्रचण्ड–माधव समूहमा रहेका बेला उनकै नेतृत्वमा प्रदेश कमिटीको खाताबाट झिकिएको रकम अझै फिर्ता नभएको नेकपा एमाले प्रदेश कमिटीले जनाएको छ ।

उनी एमाले व्युतिसकेपछि माधव समूह हुँदै एमालेमै फर्के पनि ३० लाख रुपैयाँको हिसाव नआएको एमाले सुदूरपश्चिम प्रदेशका इन्चार्ज लेखराज भट्टले बताए । मंगलबार धनगढीमा भएको सुदूरपश्चिम प्रदेश कमिटीको पूर्ण बैठकको निर्णय सार्वजनिक गर्न आयोजित पत्रकार सम्मेलनमा पत्रकारको प्रश्नमा बोल्दै उनले यस विषयका कुनै छलफल नभएको बताए ।

‘पार्टीमा पहिला साँगठनिक रुपमा पार्टीलाई व्यवस्थित गरौं भन्नेर छलफलमा लाग्यौं, त्यहाँ उहाँसंग कुरा नमिलिरहँदा खाताको प्रश्ननै आएन’ उनले भने, ‘यस विषयमा कुरा गर्ने मौका पनि भएको छैनन् । उहाँले पनि अहिलेसम्म केही भन्नुभएको छैन । हामीले पनि सोधेका छैनौ ।’ उनले यस विषयमा बिस्तारै छलफल गर्ने बताए ।

‘उहाँ पार्टीको उपाध्यक्ष भएकाले पार्टीको रकम फिर्ता दिनुहोला भन्ने हामीलाई विश्वास छ,’ उनले भने ।’रावलको नेतृत्वमा नेकपाको विवाद हुँदाताका ३० लाख रुपैयाँ लुटेको आरोप लागेको छ । रावलले पनि आफू इन्चार्ज भएकाले प्रदेश कमिटीको खाताबाट पैसा निकालेको स्वीकार गरिसकेका थिए ।

२३ कात्तिक २०७८, मंगलवार १९:२२ बजे प्रकाशित