गैर आवासीय नेपाली संघले कञ्चनपुरका बाढी प्रभावितहरुलाई एक करोड बराबरको राहत सामग्री वितरण गरेको छ । मंगलबार दोधारा चाँदनी नगरपालिका र भीमदत्त नगरपालिकाका बाढी पीडितहरुलाई उक्त सामग्री वितरण गरेको हो ।

संघले दोधारा चाँदनीका डेढ सय र भीमदत्त नगरपालिकाका डेढ सय परिवारलाई राहत वितरण गरेको हो । संघका मध्यपुर्व संयोजक मनोज श्रेष्ठको संयोजनमा राहात संकलन गरिएको हो । राहत विरतणमा संघका दक्षिण कोरिया प्रतिनिधि रञ्जन कुँवर लगायतको उपस्थिति रहेको थियो ।

संघले लुगा कपडादेखि खाद्यान्न र स्वास्थ्य सामग्रीहरु समेत वितरण गरेको हो । दाल, चामल, खुर्सानी, बेसार, खाने तेल, आलु, प्याज, मास्क र लुगाकपडा लगायतका सामग्रीहरु प्रभावितलाई वितरण गरिएको हो ।

संघका प्रतिनिधिहरुले भीमदत्त नगरपालिकाका नगर प्रमुख सुरेन्द्र विष्टसँग पनि भेट गरेको छ । विष्टले नदी तटिय क्षेत्रका वासिन्दाको दीर्घकालिन रुपमा सुरक्षित आवास निर्माण योजनामा सयोग पुर्याउन आग्रह गरेका छन् । प्रतिनिधिहरुले प्रभावितहरुको सहयोगका लागि अन्तर्राष्ट्रिय स्तरबाट सहयोग पुर्याउने प्रतिबद्धता जनाएका छन् ।

९ कात्तिक २०७८, मंगलवार १८:५७ बजे प्रकाशित