बिजुलीको पोलमा बाँधेर कुटपिट गरेको आरोपमा एक जना पक्राउ
रौतहटमा बिजुलीको पोलमा बाँधेर कुटपिट गरेको आरोपमा एक जना पक्राउ परेका छन्।
गौर नगरपालिका-३ पोखरिया टोलस्थित मस्जिद छेउमा रहेको बिजुलीको पोलमा बाँधेर कुटपिट गरेको आरोपमा प्रहरीले एक जनालाई पक्राउ गरेको हो।
जिल्ला प्रहरी कार्यालय रौतहटका अनुसार पक्राउ पर्नेमा ३८ वर्षीय साजिद अन्सारी छन्।
उनीसहित केही व्यक्तिहरूले सोही ठाउँका प्रिन्स अन्सारीलाई गत आइतबार बिजुलीको पोलमा बाँधेर कुटपिट गरेका थिए।
कुटपिट गरेको भिडिओ सामाजिक सञ्जालमा भाइरल बनेको थियो।
भिडिओ सामाजिक सञ्जालमा बाहिरिएपछि प्रहरीले कुटपिट गर्ने व्यक्तिहरूको खोजी गरी अन्सारीलाई पक्राउ गरेको हो।
उनीमाथि जिल्ला अदालत रौतहटबाट म्याद थप गरी अनुसन्धान गरिरहेको प्रहरीले जनाएको छ।
१७ साउन २०८०, बुधवार १४:०३ बजे प्रकाशित
