कञ्चनपुरको बेदकोटमा निर्माण गर्ने भनिएको १५ शय्याको अस्पताल निर्माणमा चासो नदिएको भन्दै स्थानीय आज नगरपालिकाको कार्यालयमा धर्ना दिएका छन् ।

२०७७ सालमा शिलान्यास गरेर २०७९ सालको चैत्र मसान्त सम्ममा सम्पन्न गर्नुपर्ने सम्झौता भएपनि अहिले सम्म यहाँ कुनै काम अगाडी नबढेको भन्दै स्थानीय आन्दोलित भएका हुन् ।

बेदकोट १५ शय्या अस्पताल निर्माण सङ्घर्ष समितिले फागुन २९ गते लिखत रुपमा चैत्र ४ सम्ममा अस्पताल निर्माण प्रक्रिया सुरु गर्न माग गरेको थियो । त्यसपछि पछि पनि नगरपालिकाले चासो नदिएको भन्दै आज धर्ना दिइएको सङ्घर्ष समितिका संयोजक खगेन्द्र नाथले जानकारी दिए ।

उनले अहिले सम्म नगरपालिकाले यस बिषयमा चासो नदिएको बताए। राजेन्द्र निर्माण सेवाले ८५ लाख पेस्की दिएर अहिले काम अलपत्र पारेको भन्दै तत्काल अगाडी बढाउन उनले माग गरे ।

आज कार्यालयमा २ घण्टा धर्ना दिएको सङ्घर्ष समितिले अझै माग सम्बोधन नभए १४ गते निर्माण कम्पनीको सम्पर्क कार्यालय घेराउ र निर्माण सामग्री जफत गर्ने, २० गते नगरपालिकामा तालाबन्दी गर्ने र २५ गते देखी अनिश्चितकनलीन आम हडताल गर्ने जनाएको छ ।

१० चैत २०७९, शुक्रवार १४:५१ बजे प्रकाशित