नेकपा एमालेले सञ्चालन गरेको मिसन ग्रासरुट अभियान अन्तरगत धनगढीमा पहिलो चरणको कार्यक्रम सम्पन्न भएको छ ।

धनगढी उपमहानगरपालिकाका १९ वटै वडामा पहिलो चरणको अभिमुखीकरण कार्यक्रम सकिएको नगर अध्यक्ष रामचन्द्र जोशीले जानकारी दिए जोशीका अनुसार सोमबार धनगढीको वडा नम्बर १५,१८ र १९ मा अभिमुखीकरण सकिएसँगै पहिलो चरणको अभियान सकिएको हो ।

आज पहिलो चरणको कार्यक्रमको समीक्षासहित नगर स्तरीय जनसङ्गठनको अभिमुखीकरण कार्यक्रम राखिएको छ भने दोस्रो चरणको अभियान अन्तरगत वडा, टोल कमिटी र सेल कमिटीसहित घरदैलो कार्यक्रम सञ्चालन गरिनेछ ।

नेकपा एमालेले सङ्गठन सुदृढीकरण तथा विस्तार कार्यक्रम अन्तरगत फागुन ५ गतेदेखि मिसन ग्रासरुट अभियान सञ्चालन गरेको छ । सुदूरपश्चिमको राजधानी समेत रहेको धनगढी उपमहानगरपालिकामा पूर्व मन्त्री तथा नेकपा एमालेका नेता गणेशसिंह ठगुन्नालाई खटाइएको छ । ठगुन्नासँगै कैलाली निर्वाचन क्षेत्र नम्बर ५ मा नेकपा एमालेका कार्यवाहक अध्यक्ष दुर्गाप्रसाद जोशीलाई खटाइएको छ । पार्टी सल्लाहकार परिषद सदस्य डिल्लीराज भट्टले प्रशिक्षण दिइरहेका छन् ।

३० फागुन २०७९, मंगलवार ०८:२८ बजे प्रकाशित