सुदूरपश्चिम प्रदेशमा आज थप एक सय जनामा कोरोना सङ्क्रमण पुष्टि भएको छ। डडेल्धुरा प्रयोगशालामा ४९, धनगढी प्रयोगशालामा ४० र डोटी प्रयोगशालामा ११ जनामा सङ्क्रमण पुष्ट भएको हो ।

डडेल्धुरा अस्पतालको प्रयोगशालामा पछिल्लो २४ घण्टामा ३ सय ५७ जनाको कोरोना परीक्षण गर्दा ४९ जनामा र डोटी अस्पतालको प्रयोगशालामा ८८ जनाको परीक्षण गर्दा ११ जनामा सङ्क्रमण पुष्टि भएको छ ।

डडेल्धुरा प्रयोगशालामा बझाङको दुर्गाथली गाउँपालिकाका ४७, दार्चुलाको शैल्यशिखर नगरपालिकाका १ जना र जिल्ला प्रहरी कार्यालय दार्चुलामा कार्यरत १ प्रहरीमा पनि कोरोना पुष्टि भएको प्रयोगशाला इन्चार्ज ईश्वरीप्रसाद भुसालले जानकारी दिए ।

धनगढी प्रयोगशालामा गरिएको परीक्षणमा ४० जनामा सङ्क्रमण पुष्टि भएको छ । पछिल्लो २४ घण्टामा ५ सय ८५ नमुना परीक्षण गर्दा ४० जनाको रिपोट पोजेटिभ आएको सेती प्रादेशिक अस्पतालका सूचना अधिकारी दिलीप कुमार श्रेष्ठले बताए ।

अछामका १८, कैलालीका १५ र कञ्चनपुरका ७ जनामा सङ्क्रमण पुष्टि भएको सूचना अधिकारी श्रेष्ठले जानकारी दिए । यस्तै उता डोटी प्रयोगशालामा डोटीकै पूर्वी चौकीका ९ र सायल गाउँपालिका र दिपायल सिलगढी नगरपालीकाका १ १ जनामा सङ्क्रमण पुष्टि भएको अस्पतालका ल्याब इन्चार्ज सौरभ श्रेष्ठले जानकारी दिए ।

१४ भदौ २०७७, आइतवार १७:५९ बजे प्रकाशित