सुदूरपश्चिममा आज पनि गौराको रौनक, धनगढीमा सार्वजनिक बिदा
सुदूरपश्चिम प्रदेशमा आज पनि गौरा पर्व माइदैछ । ७ भदौमा गौरा पर्व नमनाएका समुुदाय तथा क्षेत्रमा बिहीबार हर्सोल्लासका साथ गौरा मनाइदैछ ।
पर्वको मुख्य दिन, आज अठवली अर्थात् अष्टमीका दिन गौराको पूजाआजा गरी मनाइन्छ ।

मौलिक संस्कृति झल्किने गरी मनाइने गौरा पर्व दार्चुला, बैतडी, डडेल्धुृरा, डोटी, कैलाली र कञ्चनपुर तथा भारत उत्तराखण्डको कुमाउ, गढवालमा समेत मनाउने चलन रहेको छ ।

काम विशेषले घरबाट टाढा गएकाहरु पनि गौरा पर्व मनाउन घर फर्कने गर्छन् । गौरा पर्वको अवसरमा धनगढी उपमहानगरपालिकासहित विभिन्न स्थानीय तहले बिहीबार सार्वजनिक विदा समेत दिएका छन् ।

पञ्चमीदेखि आरम्भ हुने गौरापर्वको पहिलो दिन महिलाहरुले घरघरमा तामाको भाँडामा बिरुडा (पाँच प्रकारका अन्न) भिजाएर गौरा पर्वको विधिवत रुपमा सुरुवात गर्दछन् ।

पञ्चमीका दिन महिलाहरुले व्रत बसी केराउ, गहत, गहुँ, मास र गुरौस मिसाएर तामाको भाँडामा विरुडा भिजाएपछि गौरा पर्वको थालनी हुन्छ। पञ्चमीका दिन भिजाइएको बिरुडा भोलिपल्ट षष्ठीका दिन नजिकको धारा, तलाउ वा पोखरीमा लगेर धुने चलन छ ।

त्यस्तै सप्तमीका दिन गौरा देवीलाई नजिकैको मठमन्दिरमा भित्र्याएर पूजा अर्चना गरी विवाहित महिलाहरुले दुवधागो चढाउने चलन छ । अष्टमीको दिन व्रत बसेर गौरा पर्व मनाउने स्थलमा पार्वती र शिवको पूजापाठ गर्ने चलन छ ।

गौरा पर्वको मुख्य आकर्षणको रुपमा रहेको देउडामा पौराणिक कथा, देवी देवताका गाथा गाउने, चैतली, धुमरी, ढुस्को लगायतका भाकामा देउडा खेल खेल्ने चलन रहेकोख छ ।

देउडाका माध्यमबाट समाजमा भएको विकृति, देशको राजनीतिक अवस्था लगायतका बारेमा तिखो व्यङ्ग्य गरी पनि गरिन्छ । गौरा पर्व पञ्चमीका दिन आरम्भ हुने भएपनि गौरा विसर्जन भने आ–आफ्नै चलन अनुसार गर्ने गरिन्छ ।

२१ भदौ २०८०, बिहीवार ०९:३१ बजे प्रकाशित