नेपालीहरुको चाडपर्व सुरु भएसंगै  किनमेलका लागि उनीहरु भारतीय बजारमा जाने गरेका छन् । कैलालीबाट नजिकै रहेका भारतीय बजार बनगाँउ, तिकुनीया, कजरीया पलिया, सुडा तथा बनबाँसामा किनमेलका लागि नेपालीहरु पुग्ने गरेका हुन् । धनगढी बजार भन्दा केही सस्तोमा सामान पाइने भन्दै उपभोक्ता भारतीय बजारसम्म पुग्ने गरेको बताउँछन् । चाडपर्व सुरु भएसँगै थुप्रै नेपालीहरू नजिकै रहेको भारतीय बजारमा जाने गरेका हुन् । गौरीफन्टानाका हुँदै उनीहरू भारतीयबजारमा खाद्यान्न, दाल, चिनी देखि लत्ताकपडा किन्न जाने गरेका हुन् ।

भारतीय बजारमा कैलाली र कञ्चनपुरबाट मात्रै नभएर सस्तो सामान पाउने भन्दै सुदूरपश्चिमका विभिन्न जिल्लाबाट नेपालीहरू भारतीय बजार सम्म जाने गरेका छन् । धनगढी १२ जुगेडाकी पार्वती बराइलीले केही सामान सस्तो पाइने भएपछि दसैंको समान किन्न वनगाउँ बजार आएको बताइन् । नेपालभन्दा भारतीय बजारमा सामान सस्तो पाइने भएकाले उतै जाने गरेको उनी बताउँछिन् । ‘चिनी, दाल, कपडा धनगढी बजारको भन्दा केही सस्तो पाइन्छ’, उनले भनिन् ।
चाडपर्व आएपछि वनगाउँ बजारसम्म पुग्ने गरेको उनको भनाइ छ । धनगढी उपमहानगरपालिका ७ की शर्मीला चौधरीले पनि दसैंमा बच्चाहरूका लागि तथा घरपरिवारको लागि लुगा किन्न बनगाउ बजार गएको बताइन् । ‘धनगढीमा एक हजार पर्ने सुटलाई चार, पाँच सय सम्म दिन्छन्’, उनले भनिन् । सस्तो कपडा पाइने भएपछि साथीहरूसँग वनगाउँ बजार आएको उनले बताइन् । धनगढी बजारमै सस्तोमा सामान पाइने भइदिए दुःख गरेर भारतीय बजार सम्म पुग्नु नपर्ने उनको भनाइ छ । दसैंमा मात्र होइन तिहार, छठ तथा विवाह भोजका लागि सामान किन्नु पर्ने भएमा धेरै नेपालीहरू भारतीय बजारमा जाने गरेका छन् ।

‘केही रुपैयाँ सस्तो सामान पाउने भन्दै नेपालीहरू भारतीय बजार जान्छन् । तर गुणस्तरमा ध्यान दिँदैनन’, किराना व्यवसायी संघ कैलालीका अध्यक्ष लक्षमण राज पन्तले बताए । ‘हामीले भन्सार कर तिरेर सामान ल्याउने हुँदा केही महङ्गो हुन्छ, तर ग्राहकलाई मार पर्ने गरी महङ्गो हुँदैन,’ उनले भने । अखाद्य बस्तुहरु नेपालीहरुले उपभोग गर्न बाध्य हुने गरेको उनको भनाई छ । चिनी मात्रै केही सस्तोमा पाइने भएपनि अन्य बस्तुको मुल्यमा खासै फरक नरहेको उनले बताए । नेपालीहरुको कराडौं रुपैँया भारतीय बजारमा जाने गरेको उनको भनाई छ ।
‘नेपालमा पाइने सामान गुणस्तरीय हुने गरेको भएपनि तर नबुझेरै धेरै नेपालीहरू सस्तो पाउने भरमा भारतीय बजार सम्म पुग्ने गरेका छन्,’ अध्यक्ष पन्तले भने । केही सामान नेपाली बजारमा महङ्गो हुने गरेको भएपनि तर गुणस्तरीय हुने गरेको उनले बताए ।

चाडपर्व तथा कुनै भोज भतेरमा नेपालीहरु सस्तो पाउँने आशामा भारतीय बजार पुग्ने गरेका छन् । केही साना व्यापारीहरूले पनि फलफूल तथा तरकारीहरू भारतबाट ल्याउने गरेका छन् । यसरी भारतबाट आउने सामानमा गुणस्तरीय भने नहुने कैलाली उद्योग वाणिज्य संघ, कैलालीका अध्यक्ष पुष्पराज कुँवरले बताए । उनले खाद्यान्न तथा अन्य सामानहरूमा गुणस्तीयता भने नहुने बताए ।
‘धनगढी बजार छोडेर भारतीय बजार जाँदा नेपाली बजारमा पनि असर पर्छ’, उनले भने । यसका लागि भन्सार कार्यालय कैलालीले पनि कडाइ गर्नुपर्छ । भारतीय बजारमा नेपाली उपभोक्ता जाने गरेमा यसले नेपालको अर्थतन्त्रलाई पनि असर पर्ने उनको भनाई छ ।

१५ असोज २०७९, शनिवार २०:०८ बजे प्रकाशित