प्रधानमन्त्री तथा नेपाली कांग्रेसका शेरबहादुर देउवाले एमाले अध्यक्ष केपी ओलीसँग वाक्क भएपछि माओवादी केन्द्रका अध्यक्ष प्रचण्ड आफूतिर आएको बताएका छन् । धनगढीमा सत्ता गठबन्धनले आयोजना गरेको चुनावी सभालाई सम्बोधन गर्दै उनले यस्तो बताउका हुन् ।

लामो समयदेखि एमालेमा रहेका माधव नेपालले पनि अध्यक्ष ओलीको साथ छोडेको देउवाले बताए । नेकपा एमालेले चुनाव जिते फेरि संसद भंग हुन सक्ने उनको आशंका छ । ‘ओलीजीको पार्टीलाई जिताउने भनेको संसद भंग गर्न दिनु हो । त्यस्तो व्यक्तिलाई संसदमा ल्याउनु हुन्न । एमालेमा ओलीले सबैलाई थर्काएर राखेका छन्’, उनले भने, ‘एमालेले जितेको खण्डमा संसद, प्रदेश, स्थानीय तह भंग गर्न सक्छन् । त्यसैले कांग्रेस र तालमेल भएका ठाउँमा गठबन्धनलाई जिताउनुहोस् ।’

अहिलेको अवस्थामा एमालेलाई जिताउनु नहुने देउवाको भनाइ छ । उनले एमाले विजयी भएको अवस्थामा प्रतिनिधिसभा मात्रै नभएर प्रदेश र स्थानीय तह नै भंग गर्न सक्ने बताएका थिए ।

‘ओलीले दुई पटक संसद भंग गरे । हामीले अदालतबाट फिर्ता ल्यायौं’, उनले भने, ‘एमालेले चल्न दिएको छैन । एमालेलाई जिताएर के गर्ने रु संसद भंग गर्न दिने रु’ अहिले गठबन्धनको सरकारलाई जिताउनुपर्ने देउवाको भनाइ छ । अहिलेको आवश्यकता गठबन्धन बलियो बनाउनु रहेको देउवाको भनाइ छ । सबै ठाउँबाट ल्याएर गठबन्धनको सरकार बनाएको उनको भनाइ थियो ।

देउवाले बागी उम्मेदवारहरूलाई फिर्ता लिनसमेत निर्र्देशन दिए । ‘जो आधिकारिक उम्मेदवार होइन, उसले फिर्ता लिनुस । उम्मेदवार नरहेको घोषणा गर्नुस’, देउवाले भने, ‘बागी उम्मेदवार मान्य हुँदैन । बागी उम्मेदवारका कारण चुनाव हारेका छौं । बागीकै कारण चुनाव हारियो भने कुनै पनि हालतमा माफी हुँदैन । कारबाही गर्छौ ।’ यस्तै देउवाले पाँच पटकसम्म प्रधानमन्त्री सुदूरपश्चिबासीकै मायाले भएको बताएका छन् ।

२६ वैशाख २०७९, सोमवार १६:५२ बजे प्रकाशित