कैलालीमा सत्तारुढ गठबन्धन दलहरुले उम्मेदवार उठाउँदा प्रमुख तथा उपप्रमुख पदमा महिलाहरुलाई पाखा लगाएका छन् । एउटै दलबाट उम्मेदवार बनाउँदा मुख्य पदमा कम्तीमा एकजना महिला हुनैपर्ने प्राबधानलाई गठबन्धनबाट उम्मेदवार छनौट गर्दा लत्याइएको हो ।
कैलालीमा तीन दलीय गठबन्धनबाट आधिकारिक उम्मेदवारको नाम सार्वजनिक गर्दै दलहरुले यहाँका १३ वटा पालिकामध्ये एउटा पालिकामा मात्रै महिलालाई मेयरको उम्मेदवार बनाएको जनाएका छन् । यसअघिको निर्वाचनमा १३ वटै स्थानीय तहमा उपप्रमुख महिला रहेकोमा यसपालि गठबन्धनले ६ वटा पालिकामा मात्रै महिलालाई उपप्रमुखमा उम्मेदवार बनाएको छ ।

नेपाली काँग्रेस, माओवादी केन्द्र र एकीकृत समाजवादीबिच मात्रै कैलालीमा गठबन्धन भएको छ । लम्की चुहा नगरपालिकामा मात्रै कांगे्रसबाट प्रमुखमा सुशिला शाही उम्मेदवार रहेकी छन् ।
गठबन्धनले माओवादीबाट उपप्रमुखमा शान्ति अधिकारी र जानकी सिंह तथा एकीकृत समाजवादीबाट रत्ना कडायत र नेपाली काँग्रेसबाट धना थापा, भगवतीकुमारी चौधरी र गुलियादेवी चौधरीलाई उम्मेदवार बनाएको छ ।
बुधवार एक विज्ञप्तिमार्फत गठबन्धनले आधिकारिक उम्मेदवारको नाम सार्वजनिक गर्दै धनगढी उपमहानगरपालिकामा मेयर पद काँग्रेसलाई र उपमेयर माओवादीलाई वण्डा गरेको जनाएको छ ।
तीन दलीय गठबन्धनबाट धनगढीको मेयरमा कांग्रेसका नृपबहादुर वड पुनः दोहोरिएका छन् । अघिल्लो चुनावमा माओवादीबाट उपमेयरमा लडेर पराजय ब्यहोरेकी शान्ति अधिकारीले यसपल्ट गठबन्धनबाट पुनः उपमेयरमा उम्मेदवारी दर्ता गराएकी छिन् ।

कैलालीको गोदावरी नगरपालिकामा गठबन्धनबाट मेयरमा काँग्रेसका वीरेन्द्र भट्ट र उपमेयरमा एकीकृत समाजवादीकी रत्ना कडायतले उम्मेदवारी दर्ता गराएका छन् । भट्ट यसअघिको निर्वाचनमा एमालेका उम्मेदवार हरिसिंह साउँदसँग पराजित भएका थिए भने कडायतले एमालेबाट उपमेयरमा जित हासिल गरेकी थिइन् ।

गठबन्धनले घोडाघोडी नगरपालिकामा एकीकृत समाजवादीका तर्फबाट खडक रावतलाई नगर प्रमुखको उम्मेदवार बनाइएको छ भने नेपाली काँग्रेसबाट गुलिया देवी चौधरीलाई उपमेयरको उम्मेदवार बनाइएको छ ।
नेपाली कांग्रेस कैलालीका सभापति नारायणदत्त भट्टका अनुसार लम्की चुहा नगरपालिकामा काँग्रेसबाट सुशीला शाहीलाई गठबन्धनले उम्मेदवार बनाएको छ भने माओवादीकी जानकी सिंहले उपमेयरमा उम्मेदवारी दर्ता गराएकी छन् ।
गौरीगंगा नगरपालिकामा माओवादी केन्द्रले मेयर र काँग्रेसले उपमेयर पद पाएको छ । गठबन्धनले यहाँ माओवादी केन्द्रका तर्फबाट देवदत्त कँडेललाई मेयर र भोजबहादुर बमलाई उपमेयरको उम्मेदवार बनाएको छ ।

टिकापुर नगरपालिकामा कांग्रेसबाट नवराज रावललाई मेयर र खडक शाहीलाई उपमेयरको उम्मेदवार बनाइएको छ । भजनी नगरपालिकामा माओवादीका तर्फबाट शेरबहादुर चौधरीलाई मेयर र कांग्रेसका तर्फबाट गोकेन्द्र भण्डारीलाई उपमेयरको उम्मेदवार बनाइएको हो ।
चुरे गाउँपालिकाको मेयरमा समाजवादीबाट लोकबहादुर सारुमगर अध्यक्ष र धना थापा काँग्रेसबाट उपाध्यक्षको उम्मेदवार बनाइएको छ । जानकी गाउँपालिकामा नेपाली काँग्रेसका तर्फबाट परशुराम महतो कठरियालाई अध्यक्ष र जयप्रकाश दहितलाई माओवादीका तर्फबाट उपाध्यक्षको आधिकारिक उम्मेदवार बनाइएका हो ।

जोशीपुरमा काँग्रेसका तर्फबाट बशराम कठरियालाई अध्यक्षको उम्मेदवार बनाउँदा माओवादी केन्द्रबाट उपाध्यक्षमा दीर्घ विनाडीलाई आधिकारिक उम्मेदवार बनाइएको छ ।
यस्तै कैलारी गाउँपालिकाको अध्यक्ष पदको लागि माओवादीबाट लाजुराम चौधरी र उपाध्यक्षका लागि कांगे्रबाट भगवतीकुमारी चौधरीलाई आधिकारिक उम्मेदवार बनाइएको हो ।
मोहन्याल गाउँपालिकाको अध्यक्ष पदका लागि माओवादी केन्द्रबाट देवीदत्त उपाध्याय र काँग्रेसबाट कमल बहादुर साउदलाई अध्यक्ष तथा उपाध्यक्षको आधिकारिक उम्मेदवार बनाइएको हो ।

वर्दगोरिया गाउँपालिकाको अध्यक्ष पदका लागि काँग्रेसबाट शेर बहादुर कठरिया र उपाध्यक्षका लागि गणेश गिरीलाई माओवादीका तर्फबाट आधिकारिक उम्मेदवार बनाएको हो । तीन दलीय गठबन्धनले बुधवार प्रेस विज्ञप्ति जारी गर्दै सो जानकारी दिएको हो । यस्तै गठबन्धनले बागी उम्मेदवारलाई उम्मेदवारी फिर्ता लिन पनि आग्रह गरेको छ ।

१४ वैशाख २०७९, बुधवार १६:४७ बजे प्रकाशित