पहिलो चरणको निर्वाचनमा आवश्यक ५१ प्रतिशत मत कुनै उम्मेदवारले पनि ल्याउन नसकेपछि नेपाली काङ्ग्रेस कैलालीको सभापति चयनका लागि फागुन १९ गते दोस्रो चरणको निर्वाचन हुँदैछ । पहिलो चरणमा सर्वाधिक मत ल्याएका र प्रकाशबहादुर बम र उनका निकटतम् प्रतिद्वन्द्वी नारायणदत्त भट्ट बीच दोश्रो चरणको प्रतिस्पर्धा हुँदैछ । काङ्ग्रेस सभापति चयनका लागि दोस्रो चरणमा प्रतिस्पर्धा गर्न योग्य भएका बम र भट्ट दुवै जना संस्थापन पक्षका हुन् । संस्थापन इतर पक्षबाट सभापतिमा उम्मेदवारी दिएका रामबहादुर कलेल पहिलो चरणबाट बाहिरिएका छन् । तर जिल्लाको नेतृत्व चयनमा निर्णायक भुमिका भने उनकै हुने देखिएको छ ।

निर्वाचन दोश्रो चरणमा प्रवेश गरेसँगै दुवै पक्ष आफ्नो जीत सुनिश्चित गर्न विभिन्न रणनीतिमा लागेका छन् । यसबीच एक अर्का पक्षलाई आरोप प्रत्यारोप लगाउनेदेखि मतदाता रिझाउन विभिन्न प्रलोभन दिनेसम्मका काममा व्यस्त छन् । भट्टको पक्षमा कैलालीका ६ जना केन्द्रिय सदस्य खुलेर लागेपछि कार्यकर्तामाझ आलोचना भएको छ । ६ जना केन्द्रिय सदस्य लागेर पनि बमको भन्दा कम मत आएपछि सामाजिक सञ्जालमा उनीहरुको आलोचना भएको हो ।

सभापतिका उम्मेदबार बमलाई नेपाली काङ्ग्रेस कैलालीका निवर्तमान सभापति नरनारयाण शाहको समर्थन रहेको जनाइएको छ । यस्तै, भट्टसहित उनको प्यानललाई धनगढी उपमहानगरपालिकाका प्रमुख नृपबहादुर वड, उपप्रमुख सुशीला मिश्र भट्ट, इश्वरी न्यौपाने, जीवन राना लगायतका केन्द्रीय सदस्यहरुको समर्थन रहेको छ । धेरै जसोले भट्टको पक्षमा नेता र बमको पक्षमा कार्यकर्ता रहेको टिप्पणी गरेका छन् । उनीहरुले कार्यकर्ताले पत्याएका बमको जित लगभग सुनिश्चित रहेको बताएका छन् ।

पहिलो चरणको निर्वाचनमा जम्मा दुई हजार ४८५ मत खसेको थियो । काङ्ग्रेसको विधान अनुसार सभापतिमा जित्नका लागि एक हजार २४३ अर्थात ५० प्रतिशतभन्दा बढी मत अनिवार्य रुपमा ल्याउनु पर्ने थियो ।
पहिलो चरणको निर्वाचनमा सभापतिका उम्मेदवार प्रकाश बमले एक हजार १६९ मत र निकटतम् प्रतिद्वन्द्वी नारायणदत्त भट्टले एक हजार ७२ मत प्राप्त गरे । सभापतिमा विजयी हुनका लागि एक हजार २४३ मत ल्याउनु पर्ने थियो । तर, सभापतिको कुर्सीसम्म पुग्नका लागि बमको ७४ र भट्टको १७१ मत कम भयो । सभापतिका अर्का उम्मेदवार रामबहादुर कलेलले १९७ मत प्राप्त गरे । कम मत प्राप्त गरेका कलेल सभापति दौडबाट बाहिरिएपछि अब, बम र भट्टबीच प्रतिस्पर्धा हुनेछ ।
सभापति होडबाट बाहिरिएको संस्थापन इतरपक्ष नै अब काङ्ग्रेस कैलालीको सभापति जिताउनमा निर्णायक देखिएको छ । सो पक्षका उम्मेदवार कलेलले प्राप्त गरेको १९७ मत एकमुष्ट रुपमा बम वा भट्ट जसको पक्षमा गए पनि जितको लागि पर्याप्त हुनेछ ।

संस्थापन इतर पक्षको भोट निर्णायक हुने भएपछि सभापतिका उम्मेदवार पक्षहरु संस्थापनको साथको लागि कसरत गर्न थालेका छन् । दुवै उम्मेदवारले सहयोग गर्नका लागि आग्रह गरिरहेको संस्थापन इतर पक्षका एक नेताले बताए । ‘हाम्रो पक्षको भोट निर्णाय बन्ने भएपछि दुवै उम्मेदवारले सम्पर्क गरेर सहयोग गर्न आग्रह गरिरहनु भएको छ । बरु, के कुरामा मिलाउनुपर्छ, हामी मिलाउँछौं भनिरहनु भएको छ’, ती नेताले भने । ‘हामी छलफल गरिरहेका छौं । अधिकतम् सहमति भएका उम्मेदवारलाई सहयोग गर्छौ ।’
कैलालीमा क्षेत्र नम्बर २ मा संस्थापन इतर पक्षको सङ्ख्या बढी छ । सो क्षेत्रमा १६० भन्दा बढी इतर पक्षको मत रहेको जनाइएको छ । बाँकी निर्वाचन क्षेत्रमा यो पक्षको सङ्ख्या निकै कम छ ।

१८ फागुन २०७८, बुधवार १४:१९ बजे प्रकाशित