सेती प्रादेशिक अस्पतालमा उपचाररत दुई जना कोरोना संक्रमितको मृत्यु
सेती प्रादेशिक अस्पतालमा पछिल्लो २४ घण्टामा दुई जना कोरोना संक्रमितको मृत्यु भएको छ ।
अस्पतालमा उपचाररत बझाङको शुर्मा–४ का ७७ वर्षीय पुरुष र शुर्मा–२ का ४० वर्षीय पुरुषको मृत्यु भएको अस्पतालले जनाएको छ । अस्पतालले प्रेस नोट जारी गर्दै दुई संक्रमितको मृत्यु भएको जानकारी दिएको हो ।
अस्पतालको प्रयोगशालामा सोमबार थप ३६ जनामा कोरोना संक्रमण पुष्टि भएको छ । १६२ जनाको नमूनाको परीक्षण गरिएकोमा ३६ जनामा संक्रमण पुष्टि भएको हो । यस्तै १२६ नमूना नेगेटिभ आएको अस्पतालले जनाएको छ ।
पछिल्लो २४ घण्टामा ५ जना संक्रमित निको भई घर फर्किएका छन् । हाल अस्पतालमा ९ जना कोरोना संक्रमितको उपचार भइरहेको छ। जसमध्ये चार जनाको आइसीयु र दुई जनाको भेन्टिलेटरमा उपचार भइरहेको अस्पतालले जनाएको छ ।
४ असोज २०७८, सोमवार १३:४० बजे प्रकाशित
