सदरमुकाम खलंगादेखि व्यासको तिंकर भञ्ज्याङ्ग जोड्ने गरी निर्माण सुरु भएको दार्चुला तिंकर सडक १३ वर्षमा ४३ किलोमिटर मात्रै ट्याक खुलेको छ ।

आर्थिक वर्ष ०६५।०६६ बाट निर्माण भएको यो सडक अहिले व्यास ३ को तुसरपानीसम्म ट्याक खुलाएको छ । सडकको ट्याक खुलाए पनि यातायात भने हिउँदयाममा ४० किलोमिटर पर्ने सुनसेरासम्म मात्रै चलेको थियो । अहिले बर्खाको समय यो सडक हिकिलासम्म मुस्किलले गाडी चल्ने गरेको स्थानीय बताउँछन् ।

अहिले महाकाली लोकमार्ग अन्तर्गत रहेको दार्चुला तिंकर सडकको जिम्मा अहिले ४७ किलोमिटर पर्दछ । सुनसेरा देखि मालको कोठेधारसम्मको ७ किलोमिटर सडक खण्ड मध्ये हालसम्म साढे तीन किलोमिटर मात्रै ट्याक खुलेको छ ।

अहिले यो क्षेत्रमा पहिरो गएर पूरै अवरुद्ध भएको छ । यो क्षेत्रमा सडकको ट्याक खुलाउन ०६९।०७० मा अमर सूर्य जेभीले जिम्मेवारी पाएको थियो । तर चालू आर्थिक वर्षमा अमर सूर्यले ६०० मिटर मात्रै सडकको ट्याक खुलाएको दार्चुला तिंकर सडक योजना प्रमुख अच्यूत पन्तले बताए ।

६ पटक म्याद थप गरेर पनि सडकको ट्याक खुलाउन नसकेपछि अहिले म्याद थप गर्ने कि नयाँ ठेक्का व्यवस्थापन गर्ने भन्नेबारे निक्र्यौल भएको छैन् । तिंकर सडकले गाउँपालिकासम्म सडक सुधार गर्न गत वर्ष चार वटा ठेक्का लगाएको छ भने कालोपत्रेको काम अघि बढाउन लागेको छ । तर अझै यो सडक नियमित चल्ने कहिले हो भन्नेमा स्थानीय आंशका गर्छन् ।

गाउँपालिका प्रवक्ता एवं वडा नम्बर २ का वडाअध्यक्ष धिरनसिह बुढाथोकीले सदरमुकाम आउजाउ गर्न र गाउँ फर्किन स्थानीय डराएका बताए । उनले नेपालतिरको सडक र बाटो तत्काल बनाइनुपर्ने बताए ।

२५ साउन २०७८, सोमवार २०:२२ बजे प्रकाशित