बैतडी, असार २४ । लगातारको बर्षाका कारण जयपृथ्वी राजमार्ग फेरि अवरुद्ध भएको छ ।

बैतडी–बझाङ जोड्ने उक्त राजमार्ग अन्तर्गत बैतडीको पाटन नगरपालिका ८ साँडीघाटीमा पहिरो खस्दा सडक अवरुद्ध भएको जिल्ला प्रहरी कार्यालय बैतडीका प्रवक्ता प्रहरी निरीक्षक बलराम पाण्डेयले जानकारी दिए ।

आइतबार राति खसेको पहिरोले सडक अवरुद्ध भएको र सवारी साधन बीचबाटोमै रोकिएका प्रहरीले जनाएको छ ।

सडक खुलाउने प्रयास जारी रहेको भएपनि लगातारको बर्षाका कारण समस्या भइरहेको छ ।

यसअघि आइतबार दिउँसो पनि बैतडीको झौलेकमा पहिरो खस्दा सडक अवरुद्ध भएको थियो । झौलेकको पहिरो साँझ ५ बजे पन्छ्याएपछि केहीबेर सडक सुचारु भएपनि फेरि अवरुद्ध बनेको छ ।

२४ असार २०८१, सोमवार ०९:२७ बजे प्रकाशित