bhatbhathni

कांग्रेस कैलालीमा सुनार बने ‘म्यान अफ दि इलेक्सन’

नेपाली काँग्रेस कैलालीको अधिवेशनअन्तर्गत पदाधिकारीको मतगणना शुक्रबार सम्पन्न भएको छ ।
यही फागुन १५ गतेबाट सुरु भएको अधिवेशनमा दोस्रो चरणबाट सभापतिमा नारायणदत्त भट्ट बिहीबार नै निर्वाचित भएकोमा शुक्रबार उपसभापति, सचिव र सहसचिवको मतगणना सम्पन्न भएको नेपाली कांग्रेस निर्वाचन समिति कैलालीले जनाएको छ ।

सभापतिमा भट्ले १३५९ मत प्राप्त गरेकोमा उपसभापतिमा भट्ट प्यानलका भीम बडुवाल १३२८ र प्रकाशबहादुर बम प्यानलका खेम डगौरा थारु ९२३ मत ल्याउदै विजयी भएका छन् ।

सचिवमा बम प्यानलका नृपबहादुर सुनार सर्वाधिक १४९३ मत प्राप्त गरी ‘म्यान अफ दि इलेक्सन’ बनेका छन् भने अर्को सचिवमा भट्ट प्यानलका केशव मिश्र ११५६ मतसहित विजयी भएका छन् । यस्तै सहसचिवमा कलेशुराम चौधरी ८९६ र रामसमझ राना ८८१ मत ल्याउदै निर्वाचित भएका छन् ।
म्यान अफ दि इलेक्सन भएका सुनार को हुन् ?
नेविसंघ र तरुण दलका पूर्व केन्द्रीय सदस्य सुनार अछाम जिल्लाको साफेबगर नगरपालिका–३ प्रभा पुख्यौली घर भई हाल कैलालीको धनगढी उपमहानगरपालिका–२ बैयाबेहडीमा बस्छन् ।
बीपी कोइरालालगायतका नेताहरुले काँग्रेस स्थापना गरेर लोकतन्त्रका लागि गरेको संघर्ष, २०१५ सालमा बीपीको नेतृत्वमा बनेको सरकारले नेपालको अघि सारेको समाजवादी नीति तथा कार्यक्रम, नेपाली जनतालाई रैतीबाट नागरिक बनाउने सपना, नागरिक स्वतन्त्रताप्रतिको निष्ठाले आफूलाई काँग्रेसमा लाग्न प्रेरित गरेको सुनार बताउँछन् ।

नेपाली कांग्रेस कैलालीमा बौद्धिक नेताको छवि बनाएका सुनार कैलाली बहुमुखी क्याम्पसबाट व्यवस्थापनमा स्नातकोत्तर हुन् । सुनारसँग यसअघि विभिन्न सामाजिक संघ संस्थामा काम गर्नुका साथै नेपाल तरुण दलमा हुँदा चीन, भारतलगायतका देशमा युथ डेलिगेशनमा सहभागी भई नेपालको प्रतिनिधित्व गरेको अनुभव छ ।

यसअघि नेपाली कांग्रेस कैलालीको सदस्य रहेका सुनारले पार्टीको कार्यसम्पादन समितिको सदस्य, प्रशिक्षण विभाग प्रमुख, प्रचार विभाग प्रमुख, पार्टीको सुदूरपश्चिम प्रदेश अधिवेशन प्रचारप्रसार समितिको संयोजक, २०७४ सालको स्थानीय निर्वाचनमा पार्टीको घोषणा पत्र तयारी समितिको संयोजक लगायत विभिन्न जिम्मेवारीमा रहेर काम गरिसकेका छन् ।

सुनार पार्टीका हरेक गतिविधिमा सक्रियतापूर्वक सहभागि हुँदै आएकोमा २०६२÷६३ को जनआन्दोलनमा ९३ दिन थुनामा परेका थिए । यसै कारण उनले St. Francis University Canada मा अध्ययनको अवसर समेत गुमाउनुपरेको बताए ।

१३ औं महाधिवेशन अघिसम्म तत्कालीन कोइराला पक्षमा रहेकै कारण पार्टीमा अन्यायमा परेका सुनार त्यसयता नेपाली कांग्रेस कैलालीका निर्वतमान सभापति एवं पार्टीको सुदूरपश्चिम प्रदेश समितिका वर्तमान महामन्त्री नरनारायण शाह मनुको निकट रहेर काम गर्दै आएका छन् ।

जिल्ला अधिवेशनमा आफनो समूहका सभापति पदका उम्मेदवार प्रकाशबहादुर बमले पहिलो चरणमा सबैभन्दा बढी मत पाए पनि दोस्रो चरणमा नारायणदत्त भट्टसँग पराजित हुँदा सुनारले भने पदाधिकारीमा सबैभन्दा बढी मत ल्याएर कार्यकर्ता माझ लोकप्रिय रहेको पुष्टि गरेका छन् ।


२० फागुन २०७८, शुक्रवार २०:२६ बजे प्रकाशित

प्रतिक्रिया दिनुहोस्

सम्बन्धित शीर्षकहरु