बझाङमा कोरोनाका कारण लामो समय बन्द रहेका सामुदायिक तथा निजी विद्यालयमा आजदेखि नियमित पठन पाठन सुरू हुने भएको छ ।ल्ला कोभिड १९ व्यवस्थापन केन्द्रको सोमबार सदरमुकाम चैनपुरमा बसेको बैठकले विद्यालय खोल्ने निर्णय गरेको हो ।

बझाङमा अहिले कोभिड १९ को संक्रमणदर घटेको छ । पछिल्ला केही दिनयता सक्रमितको संख्या शून्य भएको र सबैतिरबाट विद्यालय खुलाउनुपर्ने माग आएपछि सोमबार बसेको बैठकले जिल्लाभरका विद्यालय खोल्ने निर्णय गरेको प्रमुख जिल्ला अधिकारी मोहन अधिकारीले बताए ।

जनस्वास्थ्य मापदण्ड पालना गरेर विद्यार्थीको भौतिक उपस्थितिमा पठनपाठन सञ्चालन गर्ने निर्णय गरिएको बझाङका प्रमुख जिल्ला अधिकारीले बताए ।

यस्तै जिल्लामा कोभिड १९ को संक्रमण दर घट्दै गएको भए पनि लकडाउनलाई भने निरन्तरता दिने निर्णय भएको छ । संक्रमण कायमै रहेका छिमेकी जिल्लाहरूबाट आवतजावत भैरहेकोले स्मार्ट लकडाउन भदौ ३० सम्म लम्ब्याउने निर्णय भएको हो ।

भदौ ३० गतेसम्म जिल्लाका १२ स्थानीय तहमध्ये साईपाल गाँउपालिकाबाहेक सबैमा स्मार्ट लकडाउन हुने भएको हो ।

१५ भदौ २०७८, मंगलवार १०:३१ बजे प्रकाशित