सेती प्रादेशिक अस्पतालमा शुक्रबार गरिएको कोरोना परीक्षणमा थप १०४ जनामा संक्रमण पुष्टि भएको छ । जसमध्ये आधा भन्दा बढी धनगढी उपमहागनरपालिका भित्रका छन् ।

पछिल्लो २४ घण्टामा अस्पतालको प्रयोगशालामा ३६६ नमूना परीक्षण गर्दा १०४ जनामा संक्रमण पुष्टि भएको अस्पतालका सूचना अधिकारी दिलिपकुमार श्रेष्ठले जानकारी दिए । जम्मा संक्रमितमध्ये कैलालीको धनगढीका मात्रै ५८ जना छन् ।

यस्तै धनगढीबाहेक जिल्लाका अन्य ३८ जना र अन्य जिल्लाका ८ जनामा संक्रमण पुष्टि भएको सूचना अधिकारी श्रेष्ठले जानकारी दिए । उनकाअनुसार हाल अस्पतालमा ५७ जना कोरोना संक्रमितको उपचार भइरहेको छ । जसमध्ये जसमध्ये ३ जना भेन्टिलेटरमा, ९ जना आईसीयूमा र ३५ जनाको अक्सिजनको सहायतामा उपचार भइरहेको छ ।

पछिल्लो २४ घण्टामा तीन जना संक्रमितको मृत्यु भएको सूचना अधिकारी श्रेष्ठले जानकारी दिए ।

१७ वैशाख २०७८, शुक्रवार १७:१९ बजे प्रकाशित