Hotel Flora Long Ad

उत्तमका तीन उत्तम गजल

               छन्द : भुजङ्गप्रयात

उजेलो कमै भो अँधेरो छदै छ।
दुवै छाक खाने पखेरो छदै छ।

हुँदै हुन्न प्यासी म बस्ने छु गाउँ,
न आए नि धारो पँधेरो छदै छ।

बचेरै बसौं है त कोवीड देखी,
करेत् ले डसेमा सपेरो छदै छ।

कतै हुन्न मैलो कुनै गाउँ बस्ती,
लगाएर बस्छौं कमेरो छदै छ।

न छानो छ राम्रो न दिन्छन् दवाई,
झरीमा न भिज्ने कटेरो छदै छ।

               छन्द : भुजङ्गप्रयात

म बन्ने छु बन्दा तिमी हुन्न भन्छौ।
सगै जाउँ भन्दा तिमी हुन्न भन्छौ।

दिए हुन्छ कर्जा सकेमा तिरौला,
नराखे त भाका तिमी हुन्न भन्छौ।

दिदै जान्छु छाया म हो एक वृक्ष,
दिदा बस्न हाँगा तिमी हुन्न भन्छौ।

न दिन्छौ त उर्जा न मान्छौ भनेको,
म बन्दै छु छाडा तिमी हुन्न भन्छौ।

म देखौं परी झै सधै जिन्दगीमा,
किनेको छु फाहा तिमी हुन्न भन्छौ।

बसेरा किनेरै बसौला खुसीमा,
मलाई छ आशा तिमी हुन्न भन्छौ।

न भो है सुबिस्ता न छुट दिन्छ राष्ट्र,
छले हुन्छ नाफा तिमी हुन्न भन्छौ।

रुपै मोहनी छौ छ मुस्कान उस्तै,
म गर्ने छु धावा तिमी हुन्न भन्छौ।

सबै काम बन्ने इरादा म बोक्छु,
न छोड्ने म बाचा तिमी हुन्न भन्छौ।

                            छन्द : दिक्पाल

राख्दै छु नाम तिम्रो जानेर जूनकीरी।
मन्थन गरेर लाखौं छानेर जूनकीरी।

छौ रे त मर्म जान्ने खोल्दै रहस्य सारा,
दुर्बोध तत्व बुझ्छिन् ठानेर जूनकीरी।

प्राणी बनेर तन्मा गर्जन अनेक देख्छु,
आत्मा पिलाइ दिन्छे तानेर जूनकीरी।

केही त छैन लाने बाँच्दै बचाइ खाने,
बन्छिन् परो(पकारी धानेर जूनकीरी।

उत्साह तेज हासो सत्कार जिन्दगीमा,
चम्काइ देउ धर्ती मानेर जूनकीरी।
उत्तम शर्मा ‘दर्शन’
पाँचखाल ३ काभ्रे


२४ माघ २०७७, शनिवार १२:५८ बजे प्रकाशित

Dhangadi Corona

प्रतिक्रिया दिनुहोस्

सम्बन्धित शीर्षकहरु