कञ्चनपुर। कञ्चनपुर भन्सार कार्यालयका अधिकृत चक्रदेव भट्टलाई जिम्मेवारीबाट हटाइएकाे छ।

भन्सार विभागले उनलाई तत्कालका लागि कार्यालयको जिम्मेवारीबाट हटाउँदै त्रिपुरेश्वरस्थित विभागमा हाजिर हुन निर्देशन दिएको छ ।

सामाजिक सञ्जालमा सार्वजनिक भएको विवादास्पद अडियो रेकर्डपछि भट्ट विवादमा तानिएका थिए । अडियोमा भट्ट र सशस्त्र प्रहरी बल नेपाल ३४ नम्बर गण कैलालीका एसपी खुमबहादुर केसीबीच भएको भनिएको संवाद सार्वजनिक भएको थियो ।

अडियो सार्वजनिक भएपछि उत्पन्न विवादबारे थप बुझ्नुपर्ने भन्दै विभागले भट्टलाई जिम्मेवारीबाट हटाएको हो । विभागका अनुसार उनलाई हालका लागि विभागमै हाजिर गराइएको छ ।

भट्टमाथि तत्काल कुनै अन्तिम कारबाही गरिएको वा उनको सेवासम्बन्धी निर्णय भइसकेको विवरण भने विभागले सार्वजनिक गरेको छैन । विवादमा सार्वजनिक भएको अडियोको तथ्य र त्यससँग सम्बन्धित विषयमा थप अध्ययनपछि मात्रै आवश्यक निर्णय हुने विभागको भनाइ छ।

१० असोज २०८३, शनिवार १८:०५ बजे प्रकाशित