रूखले च्यापिएर ३ जनाको मृत्यु
मधेश प्रदेशमा हावाहुरीले ढालेको रूख र घरमा च्यापिएर तीन जनाको मृत्यु भएको छ । धनुषाको सबैला नगरपालिका—१२ स्थित फकीरचन्द उच्च माविको प्राङ्गणमा हावाहुरीले रूख ढल्दा ८ वर्षीया प्रतीमाकुमारी सदा र ७ वर्षीय अरबिन्द सदाको मृत्यु भएको जिल्ला प्रहरी कार्यालय धनुषाले जनाएको छ ।
शुक्रवार मध्याह्न १२ बजेको समयमा विद्यालयको प्राङ्गणमा खेलिरहेको बेला मसलाकाठको रूख ढल्दा उनीहरू च्यापिएका थिए । मृतक प्रतीमाको घटनास्थलमै मृत्यु भएको थियो भने अरबिन्दको उपचारका लागि अस्पताल लैजाँदै गर्दा बाटोमै मृत्यु भएको प्रहरीले जनाएको छ ।
यस्तै, रौतहटको बौधीमाई नगरपालिका—१ मा घर भत्किँदा ४५ वर्षीया फुलमतीया देवीको मृत्यु भएको प्रहरीले जनाएको छ ।
२१ माघ २०७८, शुक्रवार १५:३१ बजे प्रकाशित
