प्रधानमन्त्री तथा नेपाली कांग्रेसका सभापति शेरबहादुर देउवाले आफ्नो चुनावी खर्च विवरण निर्वाचन आयोगसमक्ष पेश गरेका छन् । मंगलबार उनले प्रतिनिधिमार्फत आफ्नो चुनावी खर्चको विवरण बुझाएका हुन् ।

स्रोतका अनुसार प्रचार सामग्री छपाइ, यातायात, खाना, सम्पर्क कार्यालय स्थापना र सञ्चालनलगायतका सात शीर्षकमा २६ लाख १२ हजार खर्च भएको भन्दै विवरण निर्वाचन कार्यालयमा बुझाइएको छ ।

हालै सम्पन्न निर्वाचनमा प्रधानमन्त्री देउवा डडेल्धुराबाट प्रतिनिधिसभा सदस्यमा निर्वाचित भएका थिए । २५ हजार ५३४ मतसहित उनी लगातार सातौं पटक डडेलधुराबाट सांसदमा निर्वाचित भएका हुन् । उनले निकटतम प्रतिस्पर्धी स्वतन्त्र उम्मेदवार सागर ढकाललाई १२ हजार मतान्तरले पराजित गरेका थिए ।

निर्वाचन आयोगले प्रतिनिधिसभा तथा प्रदेशसभा सदस्य निर्वाचनमा भएको खर्च ३५ दिनभित्र पेश गर्न निर्देशन दिइसकेको छ । सो पश्चात् निर्वाचनमा भाग लिएका राजनीतिक दल र उमेदवारहरूले पनि खर्चको विवरण बुझाउन थालेका छन् ।

२० मंसिर २०७९, मंगलवार १९:३२ बजे प्रकाशित