बझाङ प्रहरीले विद्यालय सम्पर्क कार्यक्रम सञ्चालनमा ल्याएको छ। समुदाय प्रहरी साझेदारी कार्यक्रमअन्तर्गत विद्यालय सम्पर्क कार्यक्रम सञ्चालनमा ल्याइएको हो। कार्यक्रमअन्तर्गत जिल्लाका विभिन्न विद्यालयहरुमै पुगेर सचेतना दिन थालिएको जिल्ला प्रहरी कार्यालय बझाङका प्रहरी निरीक्षक रमेश दत्त अवस्थीले जानकारी दिए।

जिल्ला प्रहरी कार्यालय, महिला तथा बालबालिका तथा जेष्ठ नागरिक सेवा केन्द्र बझाङको आयोजनामा जिल्ला भित्रका विद्यालयहरुमा विद्यार्थीहरुलाई विभिन्न कुराका बारेमा जानकारी दिन थालिएको छ।

उनले भने, ‘कार्यक्रमअन्तर्गत समाजमा हुने विभिन्न विकृतिहरुलाई न्यूनीकरण गर्न विद्यालयमा गएर कक्षा ९ र १० कक्षाका विद्यार्थीहरुलाई सचेतना दिन थालेका हौँ।’ विद्यालयमा विद्यार्थीहरुसँग सामाजिक सञ्जालको गलत प्रयोग र कानुनी व्यवस्था, लागुऔषध दुर्व्यसन रोकथाम, लैङ्गिक, घरेलु हिंसा, आत्महत्या, बालविवाह, सामाजिक अपराध रोकथाम, ठगीका घटना, बाल यौन दुर्व्यवहार लगायतका विषयमा छलफल गर्ने गरिएको छ।

उनले भने, ‘विद्यालयमै पुगेर किशोर किशोरीसँग गरिने अन्तरक्रियाले समाजमा हुने विभिन्न विकृतिहरुलाई न्यूनीकरणका साथै हिंसाका घटनामा कमी हुने विश्वास छ।’ विद्यार्थीहरुले पनि यस विषयमा पछिल्लो समय चासो राख्ने गरेका छन्। उक्त कार्यक्रम अन्तर्गत बिहीबार जयपृथ्वी नगरपालिका–४ गोलाईमा रहेको बालविकास माध्यमिक विद्यालयमा उक्त कार्यक्रम गरिएको छ।

२३ भदौ २०७९, बिहीवार १७:२४ बजे प्रकाशित