सुदूरपश्चिम प्रदेश सरकारको मन्त्रिपरिषद् पुनर्गठनको भएको आइतबारमात्रै  जानकारी पाएको मन्त्री तामाङले बताएका छन् ।
माधवकुमार नेपाल नेतृत्वको नेकपा (एकीकृत समाजवादी) ले फिर्ता बोलाएका आर्थिक मामिला मन्त्री तारा लामा तामाङले आइतबार मात्रै आफूले मन्त्रीपरिषद्मा गरिएको हेरफेरबारे जानकारी पाएको बताएका हुन् ।

उनले आइतबार सामाजीक सञ्जालमार्फत आफ्नो पद गएको आइतबारमात्रै थाहा पाएको भनेर बताएका छन् ।‘सुदूरपश्चिम प्रदेश सरकारको मन्त्रीमण्डलमा हेरफेर भयो रे भन्ने सुनियो त !,’ उनले सामाजिक सञ्जाल फेसबुकमा आफ्नो तस्बिरसहित लेखेका छन्।

एकीकृत समाजवादीले गत शुक्रवार आफ्नो पार्टीका तर्फबाट प्रदेश सरकारमा रहेका ३ मन्त्री र राज्यमन्त्रीलाई फिर्ता बोलाएको थियो। एकीकृत समाजवादीबाट मन्त्री रहेका आन्तरिक मामिला मन्त्री पूर्णा जोशी, सामाजिक विकास मन्त्री लालबहादुर खड्का, आर्थिक मामिला मन्त्री तारा लामा तामाङलाई फिर्ता बोलाइएको थियो । सामाजिक विकास राज्यमन्त्री मनाकुमारी साउदलाई पनि समाजवादीले फिर्ता बोलाएको थियो ।

शुक्रबार मुख्यमन्त्री त्रिलोचन भट्टले काँग्रेसका रणबहादुर रावललाई आन्तरिक मामिला तथा कानुनमन्त्री, गोबिन्द बोहोरालाई सामाजिक विकास मन्त्री र टेकबहादुर रैकालाई सामाजिक बिकास राज्य मन्त्रीमा नियुक्त गरी सकेका छन् । यस्तै आर्थिक मामिला मन्त्रीमा एकीकृत समाजवादीका प्रकाश रावल नियुक्त गरिएको थियो । भौतिक पूर्वाधार विकास राज्यमन्त्रीबाट चुनकुमारी चौधरी फिर्ता भएकी हुन् भने एकीकृत समाजवादीकै कुलवीर चौधरी नियुक्त भएका हुन् ।

२७ चैत २०७८, आइतवार २१:०७ बजे प्रकाशित